Sommighe Daghelicsche Ghebeden

[fol. A6v]

Theodori Bezae Carmen, Op de Spaensche Vlote vvten Latijne overgheset, Tot de Koninghinne van Enghelant.

DEn Koninc van Spagnien zachmen de Zee doorploegen,
Met veel groote schepen zeer hooghe verheven,
Om ‘tKonincrijc van Enghelant aen tsyne te voeghen.
Vraeghdij na d’oorsaecke, die zal ic v te kennen gheven:
Syn hooghmoet end’ ghiericheyt heeft hem daer toe ghedreven:
Maer hoe aerdich heeft den wint syn ijdel voorstel verstoort,
Want syn Schepen end’ volc zijnder by-na al ghebleven.
De diepe verbolghen Zee heeft dees Roovers versmoort:
Maer v o Roose thoonden de Winden haer jonstich accoort,
Ja ghy kreeght de gantsche Zee tot uwen dienste subijt.
O Koninghinne een eere deser werelt, vaert vlijtich voort
Met uwe Godsalighe Regieringhe tot aller tijt,
Afghesondert van alle eergiericheyt, haet end’ nijt,
Volhert int voorstaen der vrome vroech ende spade,
Op dat d’Engelsche v, ende ghy d’Engelsche noch lange bevrijt,
Bemint zijnde vande vrome, end’ ghevreest vande quade,
Hier toe verleene v Godt syne ghenade.