Seer scoon ende suyver boeck, verclarende die mogentheyt Gods, ende Christus ghenade, over die sondighe menschen
(2007)–Anna Bijns–
Auteursrechtelijk beschermd
[pagina 256]
| |
Refereyn.Laet ons den heere nu vrolijck singhen
Want hy heeft seer heerlijcke / dingen ghedaen
Pharao is verdroncken / door Gods ghehinghen
En Israel / is door de Roy zee / ghegaen
Davidt is nu in Jerusalem ontfaen
Goliath is verwonnen laet ons niet claghen
Sampson heeft de poorten te Gasa ghestaen
Ghebroken / en opten berch ghedraghen
De Moabsche hertoghen zijn nu verslaghen
Holophernes heeft / verloren zijn hoot
De stadt van Bethulien beleyt met laghen
Is nu heerlijck verlost / uut alder noodt
Laet ons weertschappen / met onghedeesemt broot
Tpaeslam is gedoot des wy vruecht verwerven
Ghy die gheteeckent zijt / met zijnen bloede roodt
Zijt ghy met Christo verresen / wilt niet meer sterven.
Blijft levende rancxkens in Christo ghepresen
Goede vruchten doende / sonder cesseren
Wetende dat Christus vander doot verresen
Niet meer en sterft maer sal eeuwich triumpheren
De doot sal over hem niet meer domineren
Hy heeft de helle berooft de doot verslonden
Wilt in die sonden / niet meer consenteren
Nae dien ghy zijt ghestorven / der sonden
Vander wet des doots / heeft u Christus ontbonden
Acht u der sonden doot / en wilt gode loven
Maeckt dat u huysken niet ledich en wert vonden
Nu de boose geest / daer uut is ghedreven
Want seven arger dan hy / soot is bescreven
Sal hy me brengen / en in vaster erven
U huys besitten / wilt daer voor beven
Sijt ghy met Christo verresen / wilt niet sterven.
| |
[pagina 257]
| |
Alle quaetheyt / afgheset / wilt niemant hinderen
Vliet achterclap / haet / nijt / leeft voort in vreden
Begheert melck / als redelijcke / gheboren kinderen
Op dat ghy muecht opwassen in salicheden
Alle vleesschelijcke begeerten / af ghesneden
Mach den brant der oncuysheyt in u vercouwen
Want Christus Jesus / heeft voor ons gheleden
Om dat wy zijn voetstappen / nae volgen souwen
De ydelheyt der werelt / wilt voortaen schouwen
Is u siele ghesuyvert wert noch meer schoone
Tghene dat ghy hebt willet vaste houwen
Op dat niemant anders / en neme u croone
Is Christus / in u herte comen / metter woone
Jaecht hem niet uute wildy dleven niet derven
Want Paulus leert ons selve in persoone
Zijt ghy met Christo verresen / wilt niet meer sterven.
Hebt ghy de wercken der duysterheyt afgeworpen
En de wapenen des lichts ane ghetoghen
Wilt ghelijck den hont / niet weder op slorpen
Donreynicheyt die ghy uut / hebt ghespoghen
Wentelt niet weder int slijck / slachtende / der sogen
Zijt ghy door penitentie / ghewasschen reene
Tquaet geselschap / voortijts van u gheploghen
Schout nu en pijnt u daer af te scheene
Vliet doorsaken der sonden / groote en cleene
Die u voortijts te valle / hebben ghebrocht
Maect u metter werelt / niet ghemeene
Leeft nu nae den geest / hebt ghy tvleesch ghesocht
Niet met silver / oft goude / zijt ghy ghecocht
Maer metten bloede des lams soet als conserven
Ghy die doot hebt gheleghen / inder sonden crocht
Zijt ghy met Christo verresen wilt niet meer sterven.
| |
[pagina 258]
| |
Van allen boosen wercken / wilt nu voort rusten
Hebt ghy dwarachtich / Hemels broot / gesmaect
Laet u na dmeel van Egypten niet lusten
Zijt ghy uut Sodoma / en Gomorra / geraectGa naar voetnoot52
Siet niet omme als Loths Wijf oft ghy wert ghelaeckt
Soe doende / mocht / ghy / in steenen verkeeren
Sijt neerstich int ghebet want u vyant waect
U omgaende als een leeu / nae Petrus leeren
Soe ghy u leden hebt ghebruyct in oneeren
Ghebruyctse nu in Gods dienste / nae Paulus raet
Wandelt voorsichtelijck / inden wech des heeren
Den tijt waernemende / want de dagen zijn quaet
Siet dat ghy niet en valt / eest dat ghy staet
Is u schult vergheven wilt gheen nieu opkerven
Wacht dat ghy Gods Gratie / niet en versmaet
Sijt ghy met Christo verresen / wilt niet meer sterven.
Prince.
Sijt ghy uut Pharaonis handen verlost
Wilt na dlant van Egypten / niet omkijcken
U te wasschen heeft Christo / al zijn bloet ghecost
Dus en wilt u ziele / niet weder beslijcken
Sijt ghy warachtelijck verresen latet blijcken
Bedroeft u int quaet / daer ghy in hebt verblijt
Wilt uut den wech der penitentien niet wijcken
Om der werelt ghenuchte / desen lustighen tijt
Bereydt u siele tot tentatien / u naect strijt
Wilt ghy u tot Gods dienste keeren voorwaer
De werelt sal u bevechten / en svyants nijt
En u eyghen vleesch / gheenen strijt soo swaer
Neempt u cruyce op u / en volcht Christum naer
De genuchte der werelt / acht min dan scherven
Al siet ghy quaet exempel / hier en daer
Zijt ghy met Christo verresen / wilt niet meer sterven.
|
|