Seer scoon ende suyver boeck, verclarende die mogentheyt Gods, ende Christus ghenade, over die sondighe menschen
(2007)–Anna Bijns–
[pagina 204]
| |
Refereyn.O Eeuwich licht / alderclaerst in schijne
Vader Sone heylich Gheest / een God divine
Hoe deerlijck werde ick al ist my pijne
Van u ghetoghen
Den geest haect om met u vereenicht te zijne
Maer smenschen vleesch vol van fenijne
Dat is altijt ick proeft wel aen dmijne
Ter eerden gheboghen
Tfy valsch fenijn in deertsch paradijs ghespoghen
In dmenschelijck herte dwelck wy al erven
Van ons ouders / door de slanghe bedroghen
Tquaet hebben wy van moeders borsten gesoghen
Daer wy tijtlijck / en dicwils eewich door sterven
Den geest versmaet wellust / tvleesch en wilts niet derven
Dus doe ic met Paulo / tegen mijnen danc
Tquaet dat ick niet en wille / menich werven
Den geest is bereet / maer tvleesch is cranck.
Den geest begeert / al hemelsche dinghen
Het vleesch wilt lachen / spelen en singhen
Hoveren / boeleren dansen en springhen
Ydelheyt hantieren
Den geest sou geerne / de sinnelijcheyt dwinghen
Maer tbroosch cranc vleesch en wilts niet gehingen
Ja tpijnt hem den geest selve tonder te bringhen
Met duysent manieren
Dus mach ick wel segghen / naer Jobs crijeren
Smenschen leven is niet van daghelijcx strijen
Den Geest wil therte tot Gode op stieren
Maer tvleesch slachtende donredelijcke dieren
Wil hem in sienlijcke dinghen / verblijen
Den geest wil tegenspoet verduldichlijck lijen
Tvleesch schroemt daer tegen en maect groot gejanck
Dit merckende doet my segghen by tijen
Den Geest is bereet maer tvleesch is cranck.
| |
[pagina 205]
| |
O sterflijck vleesch ontfanghen in sonden
In sonden gheboren in wellust verslonden
Pijnt ghy u Gods wet door u eyghen vonden
Te verstekene
Saen volghende den raet / vanden helschen honden
Dus quetst ghy den gheest / met veel dootlijcke wonden
Ick bestae / als die gheerne waer ontbonden
Met Paulo / te sprekene
O eerden huysken haest u te brekene
Dwelck den edelen geest / deerlijck hout gevangen
Dat ick mijnen schepper als donbeswekene
Mach opelijck sien / sonder eenich dekene
In Jerusalem waer nae is geests verlanghen
Maer ay lacen tvleesch gaet contrarie gangen
Den geest wil in god rusten vry / en vry en vranck
Maer tvleesch wil al aen de creatueren hanghen
Den geest is bereet maer tvleesch is cranck.
Den geest sou geerne de sonden versaken
Maer dallendich vleesch en wiltse niet slaken
Tquaet hinderlijck vier gevoel ick in my blaken
Daer Johannes af schrijft
In veel periculen int slapen int waken
Vinde ick my selven / door svleesch ghenaken
En desen vyant hoe sal ickt maken
Altijt by my blijft
Ick moeter me huyshouwen oft ic waer ontlijft
Die mijn doot soect moet ick natuerlijck minnen
Hoe seere dat den geest teghen tvleesch ooc kijft
De natuerlijcke liefde / is soe vast verstijft
Dat hem den geest uut liefden wel laet verwinnen
Desen dootlijcken vyant / heb ick van binnen
En ick moet hem geven spijse ende dranck
Al wil ick somtijts / wat goets beginnen
Den geest is bereet maer tvleesch is cranck.
| |
[pagina 206]
| |
Het vleesch wilt altijt teghen die reden // zijn
Want als ick wil waken oft in ghebeden // zijn
Ick gevoel een ander wet in mijn leden // zijn
Die Gods wet teghen // is
Den geest sou geerne ter hemelscher steden // zijn
Maer vleesch sou altijt wel hier beneden // zijn
Mocht wellust gebruycken het sou te vreden // zijn
Daert toe gheneghen // is
Den geest sou geerneGa naar voetnoot39 hoe swaer dat int wegen // is
Sijn vyanden minnen soe Christus bevel // liet
Maer mijn sondich vleesch / soe boos int plegen // is
Het wilt hem wreken wanneert ghesleghen // is
Wie dat hem quaet doet die en jonnet niet wel // siet
Wilt den geest abstineren tvleesch sulc ghequel // vliet
Dus God dienende / en Baal / gae ic manck
Al maeck ick somtijts / een goede opstel // yet
Den geest is bereet maer tvleesch is cranck.
PRINCE.
Princelijck prince staet my in staden // heere
Maect dat ick u wegen en u toepaden // leere
Des ick my heel tot uwer ghenaden // keere
Ick moet u claghen
De werelt staet nae mijn verraden // seere
Svyants temptatien my noch schaden // meere
Tweerspannich vleesch / en wil niet versmaden // eere
Maer daer naer jaghen
Den geest sou gheerne u heere behaghen
Om eeuwelijck te wesen met u ghetroont
Maer tvleesch en wilt zijn cruyce niet draghen
Het prijst gemack / en goede daghen
En begeert sonder strijden te wesen ghecroont
Ic vinde dat in mijn vleesch / geen duecht en woont
Maer niet el dan boosheyt / en sondigen stanck
Dus segghe ick hoe wel dmy lutter schoont
Den geest is bereet maer tvleesch is cranck.
|
|