Seer scoon ende suyver boeck, verclarende die mogentheyt Gods, ende Christus ghenade, over die sondighe menschen
(2007)–Anna Bijns–
Auteursrechtelijk beschermd
[pagina 154]
| |
Refereyn.MEt suchtender stemmen / met beschaemder herten
Belijdt ick mijn sonden / in u presentie
O bermhertighe heere / met grooter smerten
Aensiende mijn besmette conscientie
Vreese ick seere / voor u sententie
Want mijn sonden zijn seer menichfuldich
Ick heb gevolcht / mijn eyghen inventie
Van uwen rade makende cleyn mentie
Als onnut knecht / u heere onghehuldich
In ydel glorie ken ick my schuldich
Swerels lof begerende / vol ypocrisijen
Gods eere niet ghesocht / maer overtuldich
Mijns vleesch ghemack / zijnde overduldich
Als u vaderlijcke hantGa naar voetnoot34 my wilde castijen
Gheenen troost aen u ghesocht in mijn lijen
Maer inde creatueren en noch boven dien
Teghen u ghemurmureert sonder vermijen
Des bidde ick genade op beyde mijn knien.
O milde Heere ghy hebt my veel gaven
Gegheven / beyde geestelijc en natuerlijck
Ick en heb niet alleen in deerde gegraven
Uwen penninc / maer misbruyct / des ben ic truerlijc
Wanneer ick dencke o heere / hoe puerlijck
Ghy mijn ziele / schiept naer u beelde reene
En weder hermaecte / met arbeyde suerlijck
Van vreesen stae ick naerlijcx onberuerlijck
Als ick mijn danckbaerheyt vinde soo cleene
Ghy hebt my panden ghegeven meer dan eene
Maer heere wel thien pont ick bens te binnen
Ghy hebt my dleven ghegeven vleesch en beene
Al heb ick dit met alle menschen ghemeene
Daer boven hebt ghy my verleent cloecke sinnen
Subtijl verstant / waer door ick u mocht kinnen
Tgoet mochte aenveerden / en tquaet mocht vlien
Dit heb ic al misbruyct / niet neerstich om winnen
Des bidde ick ghenade op beyde mijn knien.
| |
[pagina 155]
| |
Wille verstant / ende oock memorie
Die crachten mijnder zielen / mijn sinnen vijve
En heb ick niet ghebruyct / tot Gods glorie
Maer tot ydelheyt der werelt soo ick schrijve
God heeft my zijn goet gedeylt soo rijve
Want dat ick hebbe / hebben veel lien ghebreck
Ick ben volmaect van leden / gesont van lijve
En hier mede ick luttel deuchden bedrijve
Maer loope al willens den vyant inden beck
Mijnen wille heeft tot deuchden cleynen treck
Memorie verstant en zijn niet rechtvoort
Riecken smaken / heb ick misbruyckt arm geck
Dus waer ick weert te braden int helsche peck
Mijn ooren hebben / naer ijdelheyt gehoort
Door mijn tasten / gevoelen / heb ick God verstoort
Mijn ooghen hebben gheerne / dinghen ghesien
Daer ick mijn ziele / mede heb vermoort
Des bidde ick ghenade op beyde mijn knien.
Ick en vinde my selven / niet vry gheheel
Vanden hooftsonden / maer in alle sevene
Kenne ick my schuldich / te minsten een deel
Des therte van vreesen / bestaet te bevene
Door hooveerdije / waer ick gheerne / de verhevene
Haest ben ick ghestoort / niet vry van hate
In giericheyt kenne ick my te snevene
Recht oft ick eeuwelijc meynde te levene
Wercke en slave / ick vroech en late
In allen dinghen / soeckende eyghen bate
In onsuyverheyt ten minsten metten ghedachten
Ken ick my schuldich en ghelijc den Frate
Door gulsicheyt ick dbeste / liefste dronck en ate
Traech in Gods dienst moet ick my oock achten
Voor quade oorsaken / en wil ick my niet wachten
Niet achtende waer hoe oft met wien
Dat ick verkeere / dit zijn mijn drachten
Des bidde ick ghenade op beyde mijn knien.
| |
[pagina 156]
| |
Waer sal ick blijven o God der goden
Wanneer ick / moet comen in Josaphats dal
Ick heb overtreden u godlijcke geboden
Dus en weet ick niet wat ick antwoorden sal
Ick en heb u niet lief ghehadt boven al
Uwen naem ydelijck ghenomen inden mont
De heylich dagen niet geviert / dus vrees ick den val
Vader moeder niet gheeert dus is tgetal
Mijnder scult / o heere wel thien duysent pont
Ick heb mijnen naesten oock quaet ghejont
Al en heb ickx metter hant / niet dootgeslaghen
En al en heb ick niet ghestolen / goet ront
Ick heb door bedroch / uut mijnen ghierighen gront
Om goet te vercrijghen / gheleyt veel laghen
Heb ic my door dwerc / niet oncuyschlijc misdragen
Ick heb door consent / ghesondicht misschien
Valsch ghetuych ghegeven geloghen met vlagen
Des bidde ick ghenade op beyde mijn knien.
My selven siende dus vol sonden crielen
Slae ick voor mijn borst metten publicaen
Ick heb teghen de acht salicheden der zielen
Ghesondicht / geen wercken der bermherticheyt gedaen
Den Hongerigen dorstigen niet by gestaen
De ghevangenen niet vertroost oft siecken besocht
De naecte niet ghecleet / oft de pelgrims ontfaen
Gheen dooden begraven / oft daer mede gegaen
Maer heb den tijt onnuttelijck overbrocht
Tgoet niet ghedaen / dat ick wel had gemocht
Dede ick somtijts yet goets dat was my pijne
Dus tegen een goet werck / thien quade gewrocht
Heere als ghy sult comen verheven inde locht
Alle menschen oordeelen / elcken in tzijne
Waer sal ick my dan bergen / van uwen aenschijne
Want u ooghen den gront mijnder / herten bespien
Ick en heb u heere niet ghesocht / maer de mijne
Des bidde ick ghenade op beyde mijn knien.
| |
[pagina 157]
| |
Ick kenne dat ick door quaet exempel
Mijnen even mensch heb gheschandalizeert
Mijn edel siele / Gods geestelijcken Tempel
Die int doopsel hem was / gheconsacreert
Heb ick leelijck besmet / en ghevioleert
Daer uut verdrijvende den heylighen gheest
Heb ick daer inne / den vyant ghelogeert
Oock heb ick dwelck my luttel profiteert
God niet ontsien / maer de menschen ghevreest
Mijn lichamelijcke gaven / die heb ick meest
Teghen God ghebruyct / en deerlijck verquist
Mijn onreyn conscientie niet nauwe ghecleeft
Dus hanghen de sonden / daer ane / ghesneeft
Met grooten hoopen / seer vaste gheclist
Om dlichaem te voeden heb ick ghedaen list
Daer toe ghebruyckende al mijn engien
Op tvoetsel der sielen seer weynich ghegist
Des bidde ick ghenade op beyde mijn knien.
PRINCE.
Prince der Princen aldergetroutste vrient
U vaderlijcke trouwe / hebt ghy aen my ghebaert
Al en heb ick u niet / maer den vyant / ghedient
Nochtans hebt ghy my in / mijn sonden ghespaert
Uwen Godlijcken wille hebt ghy my verclaert
In u Godlijck woort / vol dieper secreten
Ick hebt wel ghehoort / maer qualijck bewaert
Seer lutter beleeft / dus ben ick beswaert
Ick kenne / ick heb ghenoech gheweten
Maer int doen / heb ick / my qualijck ghequeten
Van mijnder juecht / began ick te dwalene
Tot noch toe dleven in sonden versleten
Mijnen tijt verloren / twaer quaet vergheten
En den tijt / en is niet / weder te halene
Ick en heb niet waer me / mijn schult te betalene
Dus stae ick voor u met den beschaemden lien
Want in vele / kenne ick my te falene
Des bidde ick ghenade / op beyde mijn knien.
|
|