Seer scoon ende suyver boeck, verclarende die mogentheyt Gods, ende Christus ghenade, over die sondighe menschen

[p. 108]

Refereyn.

DRoocht af de traenkens / wilt vruecht hantieren
Vernieut uwen geest / alle droefheyt swicht
O dochters van Syon / wilt heerlijck vieren
Met olien van blijschappen u vercieren
Staet op Jerusalem en wert verlicht
Want u licht is comen in vrede ghesticht
Sheeren heerlijckheyt is over u op ghegaen
Den horen der salicheyt is opgericht
De dalen zijn vervult / de berghen gheslicht
De Doove hooren / de cruepele recht staen
Den blinden / werden dooghen open gedaen
Den armen wert blijschap gheevangeliseert
Des vaders beloefte hebben wy ontfaen
Daer de Propheten af hadden ghepropheteert
God is metten menschen gheaccordeert
Een yeghelijck doe ane / nieu bruylofs cleere
Want de bruyloft des lams wert ghecelebreert
Met nieuwer vruecht / verblijt u inden heere.

Gaet nu na Bethleem / en elck bysondere
Wilt den nieuwen Coninck / nieu gaven bringen
En siet int Cribbeken / daer merckt ghy wondere
De eeuwighe Godheyt leyt daer ondere
Thoy in doecxkens gewonden noyt vreemder dingen
Om dat wy ons hooverdije / souden dwingen
Wert de Heere / als knecht / tonswaert genegen
O dochters van Syon / wilt vrolick springhen
Met Tamboeren / Velen / een nieu lieken singen
En gaet den jonghen David teghen
Die den grooten Goliath heeft versleghen
Acht daghen out zijnde / den strijt haest begonnen // heeft
Met God vader hebben wy Paus vercregen
Door Dlammekens bloet / dat voor ons geronnen // geeft
Dengelen knielen de helle / als verwonnen // beeft
Voor dit Jonck onsprekende kindeken teere
Alle Christen volck dat onder der sonnen // leeft
Met nieuwer vruecht verblijt u inden heere.

[p. 109]

 

Onder dEngelsche Vorsten / in hemelrijcke

 

Was groote blijschap / heden op desen dach

 

Int voorborch der hellen / oock des ghelijcke

 

Den herderkens en sloech vreucht / ooc geen swijcke

 

Doen zy tkint vonden / dat int cribbeken lach

 

De sterre diemen in Orienten sach

 

Dede de Heydenen / oock zeere verblijen.

 

Datse quamen nae Bethleem sonder verdrach

 

Een Christen herte / dan wel verblijden mach

 

Want wy waren in grooter slavernijen

 

Maer Gods bermherticheyt siende ons lijen

 

Heeft ons ghesonden eenen vromen capiteyn

 

Die ons uut Egypten sal leyen en vrijen

 

Van Pharaonis ghewelt / den snooden vileyn

 

Dese blijschap is alle menschen int ghemeyn

 

Door dengelen vercondicht nae Lucas leere

 

Dus geestelijck weerlijck / groot ende cleyn

 

Met nieuwer vruecht / verblijt u inden heere.

 

 

 

Verblijt u al die inden heere hopen

 

En inder eewicheyt sult ghy vrolijck wesen

 

De poorte des hemels / is nu open

 

De Olie der bermherticheyt is ghedropen

 

In Adams wonden / en si zijn ghenesen

 

Wy die inder doot laghen / zijn verresen

 

Want dleven / heeft nu verwonnen de doot

 

De helle desgelijcx / verblijt u in desen

 

Want tsaet vander vrouwen / hoochst ghepresen

 

Heeft zijn voeten gheset / op der slangen hooft

 

Die honghert gaet te Bethleem / daer vint ghy broot

 

Schept water in blijschappen / sonder verdriet

 

Uut des behouders fonteyne / en hebdijs noot

 

Coopt sonder silver / melck en wijn om niet

 

Wonder isser gheboert / sghelijcx noyt gheschiet

 

Een maecht heeft ghebaert / men vant noyt meere

 

Het onsienlijck woort / hem handelen liet

 

Met nieuwer vruecht verblijt u inden heere.

[p. 110]

 

Ghy die in drucke voortijts saedt benaut

 

Opte vloet van Babel verdreven uut u lant

 

Hebt goeden moet weest vrolijck niet en flaut

 

Want de vyant die ons vaste / hielt geclaut

 

Is afgheslagen zijn foortsighe hant

 

Hy had ghewet zijnen bloetghierighen tant

 

Om te vernielen / theel menschelijck gheslachte

 

Maer desen stercken ghewapenden tirant

 

Die is door de toecomste Christi vermant

 

Sijn wapenen / zijn hem benomen met crachte

 

Sijnen roof is uutghedeylt / die hy nau wachte

 

Die metalen Poorten zijn ghebroken

 

Want de heere zijns testaments ghedachte

 

Soe hy onsen vaders had ghesproken

 

Ghy die ghedwaelt zijt door svyants toestoken

 

Uuten rechten weghe / elck nu weder keere

 

Roept ghenade / u misdaet / blijft ooghewroken

 

Met nieuwer vreucht / verblijt u inden heere.

Loeft den heere / met blijden geeste
Met herpen trompetten / basoenen claer
En als herten en hinden inden foreeste
Huppelt opte bergen uut swerelts tempeeste
En contempleert Gods goetheyt aldaer
Ghy ballinghen compt inne vry sonder vaer
Metten nieuwen Coninck van boven ghesonden
God die ons verre was / is nu ons naer
Verblijt u sculdenaers / tis nu tghulden Jaer
Dat alle ghevanghenen werden ontbonden
Hester geeft gratie by Assverum vonden
Peys en rechtveerdicheyt hebben malckanderen gecust
De hemelsche medecijn heeft hem laten wonden
Want hy ons te genesen had grooten lust
Den Eenhoren inder maget schoot nu rust
De slaven zijn vry / elck haest hem seere
Met sange het screyende kindeken sust
Met nieuwer vruecht / verblijt u inden heere.