Seer scoon ende suyver boeck, verclarende die mogentheyt Gods, ende Christus ghenade, over die sondighe menschen

[p. 84]

REFEREYN.

MInnelijcke Maria moeder der ghenaden
Versmaden // wilt ons niet / maer tonsen behouwe
Trouwe // troostersse / wilt ons beraden
Ontladen // van allen drucke / en rouwe
Kerssouwe // vruechdelijck / van beschouwe
Vrouwe // wiens gratie / dorre herten / maect vucht
Lucht // tempel / verciert / metten puersten gouwe
Landouwe // die ons bracht / dalder salichste vrucht
Berucht // zijn wy van sonden / des therte sucht
Vlucht // nemen wy tot u / in allen ons lijen
Strijen // moeten wy altijt / des hebben wy ducht
Voorbucht // sterck blockhuys / wilt ons bevrijen
Verblijen // verlossen van die ons benijen
Castijen // wilt oock de helsche slanghen
Inder stonden des doots / wilt ons ontfanghen.

Alder puerste maecht / moeder der bermherticheyt
Bereyt // tuwen dienste / staen de Engelsche scharen
Claren // morgenstont / daer de Sonne / der triniteyt
Spreyt // uute / haer stralen / die den dach doet naren
Waren // wy niet doot / Ja wy Eva span tgaren
Haren // man verleydende / wert dwebbe geweven
Verdreven // waren wy ballinghen veel jaren
Tbaren // dat ghy baerde / heeft ons ghegheven
Dleven // en ons lant om eewich tzijn verheven
Ghewreven // hebt ghy ontwee der slanghen hoot
Doot // sloecht ghy Holophernem / als staet gescreven
Beven // moet de helle voor u mogentheyt groot
Dbroot / der Enghelen / ruste in uwen schoot
Root // mondeken / wy roepen door groot verlangen
Inder stonden des doots / wilt ons ontfangen.

[p. 85]

 

Rasch vanden boosen vyant / wilt ons beschermen

 

Ontfermen // is u natuerlijcke maniere

 

Schiere // ontfaet ons in u moederlijcke ermen

 

Verwermen // wilt ons metter minnen viere

 

Lauriere // victorieus / vrijdt ons van dangiere

 

Balsemiere // troostbarighe medecijne

 

Robijne // blinckende / costelijcke Saphiere

 

Eglentiere // die Moyses / sach vierich in schijne

 

Fijne // wolcke / die ons leyt / door ons swerelts woestijne

 

Dijne // dienaers / hebt ghy oyt trouwe bewesen

 

Ghenesen // hebdy ons vander slangen fenijne

 

Pijne doet ghy den helschen leeu mits desen

 

Ghepresen // zijt ghy / uut duysent uutgelesen

 

Gheresen // uut Jesse / reyn blosende wanghen

 

Inder stonden des doots wilt ons ontfangen

 

 

 

Inder stonden des doots / ontfanghet ons reyn maecht

 

Draecht // dan ons vane / als wy den strijdt beginnen

 

Verwinnen helpt ons de werelt / die ons belaecht

 

Verjaecht // den vyant / die ons quelt van binnen

 

Dinnen // doet svleesch lust / op dat ons sinnen

 

Kinnen / u weerdicheyt / aldersuyverste greyne

 

Ghemeyne // loven u sancten en sanctinnen

 

Seraphinnen // alle engelen / groot en cleyne

 

Fonteyne der ghenaden // roosken sonder bleyne

 

Reyne // van ziele en van lichame

 

Bequame // God / vreeslijck den helschen vileyne

 

Pleyne // is u herte / vry van alder blame

 

Eersame // en glorieus / is uwen name

 

Fame // gaet van uwer duecht / recht sijn u gangen

 

Inder stonden des doots / wilt ons ontfangen.

[p. 86]

PRINCE.

 

Alderhoochste Princersse des hemels excellent

 

Jent // ootmoedich lelijcken inden dale

 

Spetiale // Gods / gevende Gabriel consent

 

Tconvent // des hemels / verblijde / door die tale

 

Sale // daer hy in ruste / die genas ons quale

 

Smale // roede / die sloech / de Moabsche honden

 

Vonden // hebt ghy / ghenade / principale

 

Altemale // zijt ghy schoone / vry van sonden

 

Verbonden // zijn u te loven / alle monden

 

Doorgronden // en can niemant / u diepe ootmoet

 

Vroet // waert ghy in Gods wet / soo Leeraers oorconden

 

Ghewonden // hebt ghy in doecxkens dopperste goet

 

Ghevoet // hebdy hem / die ons verloste / door zijn bloet

 

Behoet // ons van plaghen / die over ons hanghen

 

Inder stonden des doots / wilt ons ontfanghen.