Seer scoon ende suyver boeck, verclarende die mogentheyt Gods, ende Christus ghenade, over die sondighe menschen

[p. 74]

Refereyn.

ICk arme / allendighe / cranck eerdich stof
Ruydt van verstande / en van sinnen grof
Hoe sal ick my selven derren vermeten
Der hoochster Gods moeder te gheven lof
Die alle de princen / in themelsche hof
Eeuwelijck loven / sonder vergheten
Lof vrouwe der enghelen / int hoochste gheseten
Glorieus aen Salomons rechtere handt
Lof croone der maechden beloefte der Propheten
Coninginne daer de Coninck / groete / toe sandt
Lof vrouken / die den verloren penninck vandt
Cisterne van Bethleem / daer David nae luste
Lof puerste maecht / die den Eenhoren bandt
En den stercken Sampson / in doecxkens wandt
Lof gheerde van Jesse / daer gods geest op ruste
Lof soet mondeken / dat den paysmaker custe
Lof Judith die Holofernem verslagen // heeft
Lof salich buycxken / dat Christum gedragen heeft.

Lof puerste naest God gheheel sonder wee
Die thooft der slanghen / hebt getreden ontwee
Lof Maria moeder / der schoonder minnen
Lof Princesse / lof vrouwe / lof bitter zee
Die tsweert der rechtveerdicheyt doet steken in schee
Lof arcke verghult / van buyten van binnen
Lof vrouken van Thecues cloeck int versinnen
Die David versoende / op Absalon gram
Lof schoone Abigail / wijs int bekinnen
Wiens vroetheyt / Davids wrake benam
Lof Archa Noe / die in dwater swam
Doen alle de werelt / verdroncken moest blijven
Lof onnoosel duyfken suyver en tam
Dwelck uutghesonden weder in Darcke quam
Met u brenghende een tacxken van olyven
Lof Cedar / die tfenijn der slangen cont verdrijven
Lof Nardus in wiens ruec / de Coninc behagen / heeft
Lof salich buycxken / dat Christum ghedragen heeft.

[p. 75]

 

Lof claerste sonne schijnende / totter noene

 

Vruchtbarich acker / lustich ende groene

 

Die den godlijcken dau vruchtbaer / heeft ghemaect

 

Lof die tusschen God en den mensch / maect de soene

 

Noyt sondaer so groot / die uus hadde van doene

 

En u hulpe begeerde / dien ghy verstaect

 

Lof die deeuwich woort / door dwoort dat ghi spraect

 

Uuten hemel hebt in u lichaem getoghen

 

Tfenijn der slanghen en heeft u noyt geraeckt

 

Dwelck int eertsch paradijs werdt uutghespoghen

 

Eva lichtverdich / weert / door tserpent bedroghen

 

Maer onder de vrouwen zijt ghy ghebenedijt

 

Groot in ghenaden / groot int vermoghen

 

Voor u werden alle knijen gheboghen

 

In hemel / in eerde / in helle / altijt

 

Door u al themelsche heer / verblijt

 

Noch roep ick tot u als die wel claghen heeft

 

Lof salich buycxken dat Christum ghedraghen / heeft

 

 

 

Lof regenboge / hooge / inde wolcken gestaen

 

Doen de heel werelt / door dwater / was vergaen

 

God zijnen boghe / inde wolcken stelde

 

In een teecken van payse / nae scriftuerlijc vermaen

 

Dit zijt ghy Maria / seer schoone ghedaen

 

Als eenen olijfboom / gestaen / inden velde.

 

Onder de dwase maechden / waert ghy donghetelde

 

Want by God hebt ghy ghevonden gratie

 

Doen Amans haet dIsraelsche quelde

 

Verloste Hester / de Joetsche natie

 

Dus verlost ghy ons van sviants instigatie

 

Maria / ghy hebbet beste deel vercoren

 

Ghesproten uut Adams broosche generatie

 

Leyde ghy een Enghelsche conversatie

 

Ghelijck Troosken ongeschent / groeyt byden doren

 

Onsondich gheleeft / ontfangen / geboren

 

Dus roepe ick / als mijn conscientie cnagen // heeft

 

Lof salich buycxken dat Christum gedragen heeft.

[p. 76]

PRINCE.

 

Ave princersse / onder princersen / de meeste

 

Naest God verheven / inde engelsche feeste

 

Nu zijnde als een princersse ghehult

 

Al leefde ghy puer mensche / in swerelts foreeste

 

Bewaert waert ghy vanden heylighen geeste

 

In u en was noyt van sonden schult

 

Inwendich waert ghy soo / met gratien vervult

 

Niet dan godlijcke dinghen / u herte en begeerde

 

Schoon cyborie / met den puersten goude vergult

 

Waer inne Gods sone / ons vleesch aenveerde

 

Hoe soude ick u moghen prijsen na u weerde

 

Onder puer creatueren / noyt uus ghelijcke

 

Niet boven u dan God / o hoochste vermeerde

 

U exemplaer / leven / verlicht de eerde

 

En u glorie / theel hemelsche rijcke

 

Ick roepe tot u en slaet my gheen swijcke

 

Want therte / vreese / voor svyants laghen / heeft

 

Lof salich buycxken / dat Christum ghedragen / heeft