Sjweitberg (onder ps. G. Rapaille)

Goh, dae Feel. Kump hae neet biej Sonya aan d'r bak, zit hae 'n ganse nach biej ‘zién’ Katty vuer de sjlaopkamerduer. In G'n Sjprung, biej Maison Boks, woë Katty woënt en Oop en Oom en Ansj, d'r leukste puber van G'n Sjprung. En häör zuster Jeanine natuurlik. Woë de sjieke Treeskes van Sjweitberg zich de haore laote doën, want die kint get, en boéte dat is ze de helf billiger es de kapsalons in 't stedje zelf.

Feel löp dao - de wets noëts woë 't good vuer is - de duer plat, want Oop en hae zitte allebei in d'r koër en Katty auch, want die sjpiëlt piano en da kint hae teminste auch durg de waek get nao zién vlemke sjpiense.

Of die d'r oug vuer wilt höbbe? Ja, dat hat ze dan ins waal, dan ins neet. Es 't häör van pas kump, want Katty hat gewoon anger aspiraties en dat wilt Feel mer neet duudelik waere. Dus dae blief zoë lang hange, kalle en drinke mit Oop, dat hae dergeen is dae 't leech oet mot doën. En dan klopt hae vuerzichtig biej Katty op de duer, zaet dat hae d'r insigste is dae zoëväöl van häör hilt en dan deit Katty dus of ze sjliëp. En Ansj kiek durg d'r sjpliët van häör duer en zuut dan dat Feel mer wir ins geit zitte wachte en dan taege de sjlaopkamerduer van zien leefdesprinses in sjlaop vilt. Ansj vingt dat eigelik hiël leef en zielig tegeliek. ‘Goh, dae Feel’, zaet 't dan.

[p. 102]

Welbehage

- Mit de kaesjmes is in gans Sjweitberg natuurlik de leefde en vrede pandoer! En ich höb in e heuksjke biej Aetcafé Sonya - dat is 'n inspirerende omgaeving - geprobeerd ins oet te vössje wieste zoë richtig oud kaesjwoërd wie ‘welbehage’ in 't plat sjriefs of oetsjpriks. Welbehage... wie sjriefste dat in 't plat? Welbehage... moste da waalbehage zegke-sjrieve? Welbehaoge, waalbehaoge of mit enne baog drom bie fietse en get make wie: dich good nao wunsj veule?

Zoë in dizze tied van 't jaor - es ze mich van weit ich woë al neet aan d'r jas trekke om ‘get’ te doën in 't teike van 't kaesjgebuere - in zoëne tied kinne mich van die ouw wuerd in d'r kop blieve hange. Ouw wuerd en ouw begrippe. Vreij oppe aerd vuer alle luj van gowwe wil en in welbehage! Luj van gowwe wil? Wae kontroleert dat? De ueverigheid? Kinne die dat waal aan? En in welbehage! Dat sjient op huj inins wir in 't brenpunt van de belangsjtèlling te komme. Dat begrip: welbehage! Esof v'r inins massaal mit alle man aan welbehage wille doën. Of 't hoëg en hèl nuedig höbbe. D'r nimme zonger kinne. Welbehage, welbehaoge, waalbehage of waalbehaoge, egaal wieste 't zaes of oetsjpriks. Welbehage!

Apropos, d'r zint dit jaor nog noëts zoëväöl knuffels gegolle es dit jaor! Angesj gezag, d'r zit enne piek in d'r verkoup van knuffels! Dit jaor. Pardaon! Welbehage! Maoaoaoa... knuffels in weit-ich-wie-väöl-erleise saorte! Broen, lichtbroen, sjwart, raos, gael, azuur, ingelewit, panda-gevlekt, lieëwe-oker, sjtopleech-roëd, lila, turkoise, glaaswoldurgzichtig en neum mer op. Knuffels... welbehage! Da höb ich 't nog neet uever de formate. Klein, groët, diek, dun, breid of lank. Intiem vuer in de brooketesj, handtesj, botterhammetrommel, onger de patsj of achter 'n oër. Protserig vuer in de vinster, in d'r wage, op de vinsterbank en es kepke van d'r toiletspray. Knuffels, welbehage! En de laevesgroëte vuer de echte miensjelikke behoefte, vuer 't koud tekort van de jaore nuegetig. Für das kalte Fehlen in den neunziger Jahren. Pour le manque des années nuegetig... Dao zint die laevesgroëte vuer. Knuffelbuffels! Woëste bekans de duer neet mit inkumps. Knoefelboefel-wohlbehagen!

‘Ao, Jan-Peter, ich kin neet mië mit miene knuffel durg de duer!’ (Daorom kriege de twiëverdeeners sjtrak wir mië.

[p. 103]

Dat ze teminste braeke en verboewe kinne. De duere hoëger en breijer etc.) Begriepste mich leeve kaesjingel... dat ich wol weite wie me zoë oud woërd op huj neumt: Waalbehage? Dat kinste toch lankzaam aa e fenomeen neume, neet da? Dat wies toch op die hiël deepe wunsj nao wermde, nao geborgenheid, nao knoevele, knoetsje en raak mich estebleef ins aan! En d'r drang nao vreij en van gowwe wil, ich mein vuer luj van gowwe wil, al blief ich vinge dat dat lestig te kontrolere vilt! Mè vas es e hoes sjteit: de wunsj en d'r drang nao welbehage is kolossaal groët! Wolke-taore-wolkekrabbertig groët. En daorom löp d'r verkoup van die knuffels wie 'n tiet. En wat vuer ein. Zawwe ze d'r auch al höbbe in de vörm van 'n tiet? En, hóhó, vergaet dao neet biej dat die dinger precentsgewies gowwekoup zint. Dus de luj mit de klein beusj waere hiej ins neet boetegesjlaote. Paars kabinet of neet, die maoge ouch mitdeile in 't knoeffel-boeffel-gebuere. Knuffel welbehage! Gank mer nao: kat en hond is duurder. Kiek ins, dat is toch sumpel: knuffels vraete nieks, ja. Höbste gei omkieke haer. En de grotste? De knoefelboefels? Deiste toch die typhus-ficus weg die biej 't geringste verkiërd leech begint te ruuzele. Al wir e werk minder! En noe die kaesjdaag d'r zint, ziën ich 't al vuer mich. Sjoën muzieksjke. Mit e sjmoesje of religieuze iever sjtuurste d'r res van de femilie nao nachmès, laevende kaesjsjtal, concert of kerst-in en da kinstich rölse. Mit knuffel en al durg de kamer. 't Ein heuksjke in. 't Anger heuksjke in. Langs de verwerming. En nog sjieker - es de haore van diene löbbes 't kinne verdrage - kort vuer d'r aope haard gaon liegke. Zalig! Este zoën brandplek höbs, teminste. Heerlik. Vrede in welbehage. Vuer luj va gowwe wil en... Mit enne knuffel. Rölse... hae baove, doe baove, zalig! Ze zinter al aan 't make die kalle kinne. Rölse... doe onger, hae onger, heerlik. En 't nuujste van 't nuujste kump draan. Knuffels mit e recordertje woëste dan op kins laote zegke waste wils. Ah Wilke! Hoi Sjanneke! Liëste dich, wieste geaard bis, durg diene knuffel aankalle! En rölse, aankalle, höb ich auch gedaon. Gewoon aan Sonja gevraogd om mich dat in te sjpraeke. Auch nog good vuer de kontakte, man. Ja. Die hat 't mich ingesjpraoke.

‘Ah, Zjèrke, biste d'r wir? Kom mer! Kom dan!’ Dus murge zit ich wir in Aetcafé Sonya. Hat 't zelf gevraogd.

[p. 104]

En op de vètwei mak zich 't graas gereid...