Sjweitberg (onder ps. G. Rapaille)

[p. 29]

Op 't Campus Sjplendorplein sjpringt d'r kiosk mitein in 't oug. 't Dink is volges Feel get heit gewessje. Wae mit mië es tiën man drop mot, om te musicere, kriet Liechtensjteinse claustrofobie. Es 't Kueninklik Sjweitbergs Oratoriumkoër mit Kunninginnedaag drop klumt en de tradisjioneel serenaad geit zinge, zètte de iësjte en twiëde tenaore 't iësjte couplet in, bieze dan van 't dink aaf om plaatsj te make vuer de twiëde en iësjte basse, die dan nog net kans höbbe om ‘die tirannie verdrijven, die mij mijn hart doorwondt’ aaf te zinge. Want dan zint de tenaore wir en daonao de basse wir en op en aaf en op en aaf en klaor is vaerdig op de vot. Die winne nog enne kiër de honderd maeter Wilhelmus. Meint Feel.

De fanfaar van 't sjtedje durft allang neet mië drop, waeges dat biej dat op- en aafgebiés d'r dirigent 'nne bas-sax rondonger de navelsjtriëk kreeg en doe zoë mit erm en bein begos te hawwe dat de musicerende lede ‘nachtegaaltje zingt’ in 'n house-versie begoste te träöte. D'r baas van d'r Feel (loco-burgemeister) wis doe wat 'm te doën sjtong en sjprook aevegood de felicitaties oet ‘ongeach dizze kleine tegenslag’ aan 't adres van Hare Majesteit en bedankde eederein in alle aopenheid en iërlikheid vuer de belangeloze mitwirking - angesj kriege ze gein subsidie - leep de trepkes van d'r kiosk aaf, kuumde en sjpuujde esof hae dao baove verkiërde loch haw binne gekriëge, en leep doe, net get te flot, biej Café Scoen Blazoen nao binne en kiepde zich e paar oranjebitter nao binne. Die zint dae daag vuer nieks. Sjuus wie eeder jaor. Enthans, volges Feel, dat waal. En de luj vinge dat 't waer toch wir väöl good mak.

[p. 30]

Queen

- Aope gelaeze breef aan mien Kunnegin. Gelaeze durg coördinator / vuerzitter van 't Sjweitbergs Oranje Komité, d'n hiër Kirkesjluttel.

majesteit!

Waor Sjweitberg wir neet good genog? Hè, hè, hè, hè? Oranje Bäövesjte, wat höbbe die van Eysde en Zittert wat viër neet höbbe? Hè, hè, hè, hè, hè? Gaef os dao ins antwoërd op, Allerhoëgste Hoëgheid zonger trepke, mit trepke? Sjweitberg mot 't wir ontgelde, hè, hè, hè, hè? En viër hiej mer dinke dat ‘hare hkh’ onpartiedig is en gein sjteefkiendjes mak? Ja, hè, nae, neet da? Hè, hè, hè, hè? Oranje bäövesjte! Is uch uberhaupt bekind wat Sjweitberg vuer gow punte hat om kueninklik bezeuk te kriege? Weet u wel wat wij d'r allemaol voor gedaan hebbe? Als bijspeel: de letste verkeezinge. Hè, hè, hè, hè? Eederein dae kaom sjtumme kreeg e sjiek oranje vlegsjke, maedje. Ja, hè, nae, neet da? Wat höb v'r neet allemaol gedaon? Op 't Campus Splendorplein hat e hauf jaor enne verwencaravan gesjtange om Oranjalia oet te deile. Wát Sjweitberg deit nieks? Hè, hè, hè, hè? En aevegood de kranten-media tegen ons, ja. Die mooste wir zo nodig op de voorpagina zette dat ozze oranje verwencaravan durg enne naef van de coördinator/vuerzitter verkiërd is begriëpe. Omdat dae op 'n nach aan de duer sjtong te rammele mit de brook in de war en doe dinger eisde die nieks mit Oranjalia te make höbbe. Kiek hoogluchtige majesteit, dat kin ich oug. Allein mer 't negatieve droet haole. Hè, hè, hè, hè? En wetste wat ze d'r baove gezat hawwe, maedje? sjweitberg heeft het altijd net niet! Hawwe ze d'r baove gezat, de flauwerikke. Sjweitberg waor good vuerbereid, mevrouwtje majesteit! Kint g'r ozze bereumde kunssjilder Willie Michel? Enne verrekdesse gowwe, dae ontwurp normaal t-sjirter en beesbalpetsjkes, mè dae Wiekse Willie (dat is een Willie die gaer Wieckse Witte drinkt) hat sjpeciaal vuer uch, Oranje Bäövensjte, 'n sjitterende aoligverfsjilderie gemak. Drie biej zès maeter. Ies das dan jaar nuuks? Hè, hè, hè, hè? Wiel Michel hat get sjieks gemak. Maedje majesteit, 't is e prechtig sjilderie woëre mit vuer de sjtasie - zonger kaertje - doezende wachtende luj, op de perrons auch doezende luj - mit kaertje - en allemaol wachtend tot giër weledelluchtige oet eure verwentrein gaot wille sjtappe. Allemaol höbbe ze oranje

[p. 31]

vlegsjkes in de heng en de moel vol mit oranje kauwgum, wat te ziën is aan de ontelbare oranje kauwgumblaoze, die - hahahaha - durg enne ongesjilderde wind oeteigeflatsjt zint en uever ouge naas en kin van sommige in 't publiek hange. Hahaha. Dat maakt dit sjilderie auch e bietje onduegend. Geachde majesteit, d'r is os, potverdomme, auch al verwiëte dat diër neet zelf op 't sjilderie sjtaot, esof viër enne man wie d'r William Michel kinne vuersjrieve wat hae op dat dook mot sjmiëre. Kiek, dae hat dit sjilderie in zien atelier in de Próvaos gemak en dao haw hae helaas, helaas, nurges 'n foto van uch kinne vinge. Daorom sjtaot d'r neet drop. Want hae zaet nog, ich kin lestig häör drop zette mit enne kop wie enne gölle. En dao hat hae toch geliek biej, ja, hè, nae of neet dan? Daorom hat hae uch mer draaf gelaote. Namelik. Sjnap d'r? Dat hilt 't aope, namelik. Mè nae, dat is wir neet good, dao mot Sjweitberg auch wir op gepakt waere. Hè, hè, hè, hè? Nae, mevrouwtje, wat höbbe Eysde en Zittert wat viër neet höbbe? Zegk op! Hè, hè, hè, hè? Es coördinator/vuerzitter höbbe v'r mit mujte protestakties kinne taege houte. Ze wolle alle muntgeld om gaon wissele vuer marke. De waegwiezers nao Eysde en Zittert oranje verve. D'r waore ideeje om de posziëgele en cacao-blikke in 't vervolg oet 't Belsj te laote komme. Höb ich nog kinne taegehoute. Hè, hè, hè, hè? En dat alles omdat e uurke Sjweitberg d'r neet van aaf kint. V'r hawwe 'n deputatie klaor, maedje. Om akte de prinsensie te gaeve in Eysde of Zittert. Huh, mot v'r os in Zittert laote daoduje dat dao al alles vol waor en in Eysde woërt geroope dat Sjweitberg mer op de Mookerhei mot probere op uch te winke. Fòj! Zoë sjpringe ze om mit gow bedoelinge. Hè, hè, hè, hè? Gans Sjweitberg waor d'r klaor vuer. De deputatie gong d'r vuer gaon. En da maoge v'r noe tössje 't plebs gaon sjtaon en os de gemein lechsjkes van de Oranjekomité's van Zittert en Eysde aankieke. Botpeele! Die zoë riskere ruuzings oet te wille lokke. Nou dat ze mer komme es ze ruuzings wille, dat haw v'r die dat arrogant lechsjke ins nao de sjoon in, die vies nötte, pardaon. Pardaon, majesteit. Mè per sjlot van raekening höbbe eur advisäörs zitte te sjlaope, dat maog toch waal ins gezag waere. Die sjnurkerte hawwe uch 't belang van Sjweitberg oet de deuk motte doën. Os kompleet gerestaureerd Campus Sjplendorplein? Nooooit van gehoord. D'r interna-

[p. 32]

tionale pries ‘Sjweitberg-Noord Betonstad!’ Nooooit van gehoord. Oos beelderoute, oos lokale omroop, oos liëg parkeertarief, oos aspergetoernooi, de aankoms van d'r Tour, geluif ich. En dao zint die angere sjeloes op, dat is 't. En daorom is Sjweitberg wir ins neet good genog. Hè, hè, hè, hè? Nou ich kin uch verziëkere dat de leefde vuer Kunningin en Vaderland biej d'r gemiddelde Sjweitbergenaer aan e zieje dräödje hingt. Dat deit pien majesteit. Pien in 't deepste innerlikste binneste. Zegk neet dat d'r 't neet geweite höbt!

Hoogachtend, names d'r ganse oranjegezinde sjiepsjap en klaor is vaerdig op de vot.

Reur in dien eige sop, es dich die van d'r naober neet sjmak!