Platbook 3. Gebaorte en doeëd

[p. 43]

Friedje Geurts-Leeder, Venlo
Moders hand

Mien Moders hand,
wat heb ik dao
toch vuuël van meuge liere,
zeej holpe en zeej steunde mich
waal honderddoezend kiere.

Mien Moders hand
stónde noeit stil
jaor in - jaor oet - de gansen daag
en ruumde vuuël obstakels weg
van miene laevespaad.

Mien Moders hand
det zien veur mich
de moeiste die d'r oeit bestonde,
al hebbe zeej dan noow ouk al
veur ieuwig rös gevonde.

Mien Moders hand
vergaet ik noeit,
zoe ald en rimpelig en fien,
veur mich zulle d'r in elk geval
noeits baetere hand mier zien.