Platbook 3. Gebaorte en doeëd

[p. 41]

Har Parren, Gratem
Gedachte aan ome Jackie

Ze zègge des te gestorve bèst en det is ouch zoea. Dien henj höbbe die van ós losgelaote. Doe kiekst neet mieër door 't raam nao 't waer van vandaag. Doe loesterst neet langer of se örges ein duuer huuerts klatse. Doe zeest neet mieër: ‘Kom bènne en gank dich zètte. Wils se get drinke?’ Doe zeest de wuuerd neet mieër die se vreuger altied zags. 't Is stil gewoeare om dich haer. Toch hure wae dich nog spraeke en zeen mèt gesloeate ouge waas se deeds toen se nog bie ós woors.

-	Hoe se leider van Jóng-Nederlandj woors en van dien twieë waeke vakantie t'r ein opofferdjes óm mèt op kamp te gaon.
-	Hoe des se met dien ervaring 't kampveur altied aankreegs.
-	Hoe des se heels van de natuur en gaer nao de Ospelse Pieël of 't Leudal gings.
-	Hoe des se jaore klarinet speeldjes in de harmonie.
-	Hoe erg det se 't vónjs det se neet mieër kóst spele mèt dien nuuj gebit.
-	Hoe det se as lid van de borekapel grappe oethoealdjes in ‘de nacht van de kapel’.
-	Hoe det se as lid van de handjbalclub eine gevreesdje cirkelspeler woears.
-	Hoe eine aanvaller baeter doear ein steine moor kóst braeke den dich passere.
-	Det traininge op de vriedigaovendj zeker nao aafloup aeve gezellig woeare as de derdje hèlft op zunjig.
-	Det de derdje hèlft noeats door dich woor uevergeslage.

[p. 42]

-	Det klein pilskes door dich as einhapskrekkers waerdje betiteldj.
-	Hoe dien sjeur vuuer de handjbalclub 't magazien vuuer de rómmelmertj waas.
-	Det se moeilik get weg koosdjes doon ónger 't motto: Laot mer ligge, det löptj neet weg.
-	Det se altied zagst es emes vroog hoe aod det se woeards: ‘Bouwjaor 51 en tèl 't dich mer oet.’
-	Det se op fieëstjes van Jóng-Nederlandj de onbetwisdje spellekuuening woors mèt 't spel ‘vader en zoon’.
-	Hoe se eine super babysitter woeards. Toen Truus en Lène nao de vergadering van Jóng-Nederlandj ginge zootst doe waal op Ronald passen. Nao de vergadering loogs se flink te snurke oppe bank en Ronald zagt: ‘Ich höb good op ome Jackie gepastj, tante Truusje.’
-	Det se van beerdrinker, wiendrinker best gewoeare.
-	Det se vuueral eine einvoudige man woears, dae tevreje waas met waat t'r haaj.

Nae, doe zoots pas echt doead zeen as wae dich zoje vergaete. Nae, alles is nog neet veurbie. Doe laefs nog in oos verhaole uever dich. Oos henj kinne dich neet mieër vasthaoje mer waal oos wuuerd en de ouge van oos hert. Dao zóls se verder laeve toet ins alles is volbracht.