Platbook 3. Gebaorte en doeëd

[p. 21]

Jan Maas, Venlo
Mien mam...

As ik nao die alde foto kiek
op 't keske in de gooj kamer
dink ik aan dae schoeëne tied
waat jaomer toch... dae bin ik kwiet

dien grieze haor en leef gezich
dien blauwe fónkelende ouge
ik huur dich dan weer praote
‘det kins se doon... det mós se laote’

neet altied heel ik mich d'r aan
woel smeis neet nao dich luustere
bin vaerder 't laeve in gegaon
heb dien wäörd waal good verstaon

as ik nao die alde foto kiek
op 't keske in de gooj kamer
dink ik... 't waas neet zoeë verkierd
heb van dae goje raod gelierd

de bis nog maar 'n kleureprintje
beschermp door 'n stökske glaas
maar in mien gedachte bis se
van ze laeve neet oet te ‘wisse’..!