Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
AuteursrechtvrijOp de wijse: VVaeckt op ghy Christenen allen etc.Wt liefden canmen veele lijden
Dat is ghebleecken claer
Al in dit eerste tijden
Aen zoo menich Martelaer
Die Christenen waren vierich
Om Godt te dienen hoort,
Maer die heydenen bloetghierich
Die doodense om Gods woort.
Wy sullen v hier verclaren,
Vanden goeden ionghelinck vroom
Laurentius, ionck van iaren
Dese woonde binnen Room,
Van heylighe ouders ghebooren
Seer Catholijck ende fijn,
Den Paus Sixtus had hem vercooren
Om zijnen diaken te zijn.
Ser heylich was hy van leuen
Daer om was hy godes vrient
Die vaten worden hem ghegeuen
Daermen aenden Autaer Godt mede dient
| |
[pagina 83]
| |
Iae oock het siluer, ende gouden,
Datmen daer hadde vergaert,
Om de Christenen t’onder houden
Dit heeft sinte Laurens bewaert.
Alsmen den paus Pixtus ginck leyen
Nae der doot hoort mijn vermaen
Wie soude hem onthouwen van schreyen
Hadmen daer by ghestaen
Die Laures plach te dienen
Als hy die misse deedt,
Dese ghinck daer nu allienen
Met sulcke woluen wreedt.
Sinte Laurens om te thoonen
Sijn vierighe liefde groot
Al nae die Martelaers croone
Riep daer luydt ende bloot
Waer ghaet ghy O waerde Vader
Sonder uwen Soon,
Ick ende ghy, ghinghen te gader
Als ghy offerhande placht te doen.
Sixtus ghinck hem omme keeren
Nae sinte Laureys stoudt,
En sprack door den gheest des Heeren
Wat hem nae drie daghen dueren sout
Dan zoude hy God beuelen
Sijn ziel met veel meerder pijn
Maer nu den armen wt deelen
Die schatten die by v zijn.
Laureatius hooch verheuen
Die heeft daer nae, den naesten nacht
Alle schatten den armen ghegeuen
Alsoo sijn Vaders wil volbracht
Dit heeft Laures met claere woorden,
Sixtus verclaert al nae dat pas
Maer als s’Keysers dienaers dit hoorden
Hinghen zy hem zeer ras.
Al den armen riep hy te samen
| |
[pagina 84]
| |
Die dese schatten hadden ontfaen
De welcke alle daer quamen
Voor Decius te staen,
Laures ginck daer verclaeren
Met eenen vromen moet
Dat dese die schatten waeren,
Van de heylighe kercke goet.
Decius deed hem wt trecken.
Al zijn coleeren hoort mijn vermaen
Want ghy met my gaet gecken
Sal ick anders met v omgaen
Hierom offert onse Goden,
Ofte wijst my die schatten ras
Of men zal v doen dooden,
Veel wreeder dan oyt ymant was.
Desen helt seer vroom ende coene
Sprack wijs ende wel bedacht,
Met v dryegen heb ick niet te doene
Ick heb langhe hier nae ghewacht
Om sulcke gherechte te smaecken
Hierom soo hebt respijt
V afgoden gaen ick versaecken
Noch die schatten en wijs ick niet
Den tiran hoort mijn ghewaeghen
Heeft zijn wreedtheyt oock volbrocht
Met geesselen eerst gheslaeghen,
En hinck hem doen in die locht
Hy pijnde hem bouen maten
Soo boos was desen catijf
Gloyende yseren plaeten
Leyde hy hem op zijn lijf.
Als zy nu aldus bedachten
Den aldermeesten pijn.
Een rooster dat zy daer brachten
Dit docht haer het meest te zijn
Coolen zy daer onder spreyden
O grouwelijckien moort,
| |
[pagina 85]
| |
Sijn lichaem zy daer op leyden
Wie heeft oyt sulckx gehoort.
Aldus wordt hy ghebraden
Ghelijckmen die spijse doet,
Maer wat mocht het den bosen versaden
Laurens was wel ghemoet,
Gods vuur dat binnen hem wrachte
Was zoo gheweldich, ende groot
Dat ander hy weinich achte
Want die liefde gaet bouen die doot.
Desen Dienaer des Heeren
Sprack doen tot den tiran
Wilt mijn lichaem om doen keeren
Ghy katijf, ende eet daer van
Tot Christum hy hem doen wende
En danckte hem deuotelyck
Dat hy hem weerdich kende
Om te comen in zijn rijck.
Sijn Gheest heeft hy ghegheuen
Inde handen van onsen heer
Nu is hy int eeuwighe leuen
Daer is gheen pijne meer
Laet ons het oock zoo maecken
Want het is ons selfs goet,
Dat wy daer mede gheraeken
Al zoudet ons kosten bloet. Amen.
|
|