Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
AuteursrechtvrijOp die wijse. Esaias heeft ghesprocken etc.Salomon heeft ghesonghen
Een alsoo zoeten liedt,
Met alsoo vieriger tonghen
Datmen op Maria bediet
Op die berghen coemt sy springhen
Aldus gaet Salomon singhen
Siet hoe zy ouerdie heuuelen vliet
Oock comt Lucas ons beschreuen
In zijn eerste Capittel zaen,
Dat dit Gods moeder ginck bedrieuen
Want t’sy is op ghestaen,
Metter haest door groot verlanghen
Is sy ouer t’gheberchte gheganghen
Tot haer Nichte Elizabeth saen.
Dese dede eerweerdelijck groeten
O liefelijcke woort,
Dat alle bitterheyt can soeten
Als Elizabeth dat heeft gehoort
Haer Soon Ioannes ionghen
Is van vreuchden op ghespronghen
Binnen haer lichaem rechte voort.
Syn Heer heeft hy bewesen
Reuerentie ende eer,
| |
[pagina 74]
| |
Wie heeft oyt sulckx ghelesen
Nu oft oock immermeer,
Elizabeth worde ontsteecken
Door den H. Gheest zy ginck spreecken
Van Marta, en onsen Heer.
Ghebenedijt zijt ghy onder die vrouwen
En gebenedijt soo is v vrucht
Och coemt ghy my aenschouwen
Dit en had ick niet gheducht,
Dat die Moeder mijns Herten
My dus soudt comen visiteren
Wel te recht ben ick verhuecht.
Elizabeth wilt toch hooren
Sprack voorts eerbaer, en bequaem
Als v groete quam in mijn ooren,
Spranck het kint op in mijn lichaem
Hierom en wilt niet treuren
Alle dinc zal v ghebueren
Want ghy hebt ghelooft nae betaem.
Marta ghinck doen voeghen
Mijn ziele maeckt groot den Heer
Mijn gheest doet hem verhueghen
In Godt mijn salichmaecker voorweer
Hy sach aen die ootmoedicheden,
Van zijn Dienstmaecht hier beneden
Salich zullen zy my noemen van veer
Waer zijt ghy hooueerdighe vrouwen
Die v laet dienen op uwen pas,
Wilt Marta exempel aenschouwen
Die van Godt vercosen was,
Om zijne Moeder te wesen
Nochtans noemt zy by desen
Haer een dienst-Maeghet ras.
Hebt nu in v ghedachten
Haer groote ootmoedicheyt
Die met neersticheyt ginck trachten
Nae simpele Dienstbaerheyt
| |
[pagina 75]
| |
Wilt O maechden, als Maria dienen
O Vroukens wilt den armen herberch verlienen
Op dat v den hemel mach zijn bereyt. Amen.
|
|