Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
AuteursrechtvrijOp die wijse Die voghelen van deser aerden etc.Als ghy o Heer, der Heeren
V vrienden hier verliet,
Die v glorie hier souden vermeeren
Soo ghy haer dickwils gebiet
Maer zy mosten noch wat wachten
En blieuen in die stadt,
Daer sout ghy haer doen becrachten
Soo ghy haer belooffet hadt.
Doen ghy ghinct opwaerts varen
Inden throon ws vaders zoet
Die Engelen die daer waeren
Dese quamen v Heer te gemoet
Sy ghinghen v grootelijcks dancken
Voor onser salicheyt,
Die ghy ons brosschen, en crancken
Door v passie hadde bereydt.
| |
[pagina 54]
| |
Sy vraechden wt wonderheden
Hoe is, Heere v cleet zoo root
Den persse heb ick selfs ghetreden
Sprack den Heer voor clien en groot
Op dat ickse zoude doen haelen
Al wt des duiuels macht,
Soo heb ick haer schult doen betaelen
En heb haer in vrijheyt ghebracht.
Siet hier dese groote schaeren
Die my nv volgende zyn,
En van den viant gheuanghen waeren
Die zyn al geworden mijn
Dese ginck ick hem berouen
Met ghewelt al benijde hy dat
En sal ickse voeren bouen,
In die plaetse daer hy eerst sat.
Mijn broeders al te samen,
Hadden wy daer doen gheweest
Doen al dese zielen ten hemel quamen
Al in die schoone Feest,
Den Vader nae groot verlanghen
Ontfinck daer zynen Soon,
Die daer quam met soo menich gheuanghen
Al in des Vaders throon.
Ghedenckt hoe die Engelen te samen
Die salighe zielen hebben ghegroet
Een igelijck nae betaemen,
Nu verlost door het Lammekens bloet
En zouden nu eewich regneeren
Met haer in zynen throon,
Om te louen den Heer der Heeren
En aenschouwen zyn aenschijn schoon.
Den Soon des Vaders verheuen
Heeft hem dese gaue ghepresenteert
Godt heeft hem daer doen ghegeuen
Dat hy met hem regeert,
In ghelicke macht en waerdicheden
| |
[pagina 55]
| |
Is Ihesus daer ghestelt
Als zijn Vader, die nu zyn ghebeden
Verhoort, zoo die schriftuer vermelt.
Nu zijt ghy daer Ihesu gheseten
Aen ws Vaders rechterhant,
Op dat wy allen souden weten
Dat ghy zijt ons Coninck triumphant.
Die den viant vander hellen
Hebt benomen zynen macht
En al v vianden sult ghy stellen
Onder v voeten, door v groote cracht.
Laet ons metten gheest nu varen
Hier bouen in den Hemels throon
En sien hoe al die Engelsche schaeren
Daer zyn by den Vader, en by den Soon
Desen wellekoom die daer is ghehouwen
Oock vanden H. Gheest,
Ghy Enghelen diet al aenschouwen,
O mijn ziel, hadt ghy daer oock gheweest.
Gheen herte en cant contempleren
Die vruechde die daer is gheschiet,
Hoe God den vader dien doet vereeren
Die zyn ghebeden hier hout met vliet
Gheeft dat wy v gheboden houwen
En v naevolghen met verdult
Op dat wy v glorie aenschouwen
Als ghy ons wt deser aerden roepen sult.
Amor. |
|