Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
Auteursrechtvrijop die wijse: Ick heb mijn minne soo hooch gheleyt etc.Heden zoo thoonen wy blijschap groot
Al hebben die Ioden Iesum gedoot
Hy is wederom verresen,
Opten derden dach alsoo wy lesen.
Maer heden ist den veertichsten dach
Datmen hem opclimmen sach
Vanden berch van Oliueten
Aen sijn Vaders rechter hant gheseten.
O Heere ghy vaert nu daer heen
En v vrienden laet ghy daer beneen
Al in dit dal der traenen,
Maer hoe soet coemt ghy haer vermaenen.
Sy zouden blieuen in die stadt
Tot dat ghy den trooster gesonden hadt
V Heylighen Gheest van bouen
Die ghy gaer gunckt beloouen.
V vrienden die waren seer desolaet
Haer heer en meester, haer ontgaet
Sichtbaerlijck wt haren ooghen
Daer sy groote liefde toe droghen.
V Apostelen stelen belast ghy seer fijn
Dat zy v ghetuighen souden zijn
In Iudeen ghy haer seynde
En tot al des werels eynde.
| |
[pagina 53]
| |
V benedictie ghy haer gheeft
Die haer luyden zeer versterckt heeft
Dit was v adieu voor desen,
Nochtans en bleuen zy gheen wesen.
Nae dat ghy, O Heere dus hooch optreckt
Zoo heeft een wolcke v bedeckt
Dus zijt ghy op ghetoghen
V vrienden wt haer ooghen.
Twee van v Enghelen o Heer
Die sont ghy opten berch neer
Sy seyden ghy sout alsoo weder comen
Als ghy van haer waert ghenomen.
Sy ginghen nae Ierusalem heen
Sy waeren verblijt al int gemeen
Sy gheloofden nu warachtich,
Ghy waert Gods zoon almachtich.
|
|