|
| |
| |
| |
Propempticon, Ad Nobiliss. & Generosiss. Dominos, D. Ioannem
Georgivm Cigan, et Wenceslavm Cigan, Fratres, Barones de Sloupska, quum relicta Batavorum
Academia Silesiam repeterent.
IX.
MAgne maris Nereu domitor, qui gurgite vasto
Belgiacis gelidam secludis finibus Arcton,
Et procul offensi victrices Caesaris iras,
Et debellatum spectas è fluctibus Albim:
Tuque, per aequoream pandens tua littora Thetyn,
Terra potens, mediumq́ue bibens Germania Rhenum,
Sumite depositum, Batavis quod reddimus oris,
Nec vestros violate deos. compescite Martem,
Et strictos geminis avertite fratribus enses,
Si veniam meruit pietas, si nescia fraudum
Pectora relligio est manibus temerasse profanis.
Non nostrum est, quod fertis, onus, sed nomina vobis,
| |
| |
Et patriae sperata suae, quibus otia tellus,
Et coniurati spondent sua commoda venti.
Sat pelago trux saevit hyems, & bella minantes
Disiecit Iovis ira rates. Haec pacis alumnos
Cymba vehit, solumq́ue ferunt pia carbasa Phoebum.
Caedibus Europae maduit caput, efferus ensis
Vangionum tristes maculavit sanguine terras,
Et Boios fato domitos. Sua damna triumphans
Austriavus dolet, & victrix fortuna suorum
Morte cadit, propriosq́ue obitus ulciscitur ultrix.
Hoc regum trahit ira nefas, sceptriq́ue furores
Insons turba luit. Sed vos iam parcite dextrae,
Assuetaeque malis animae, tinctaeque recenti
Caede manus, donec tantum Silesia pignus
Possideat, Viadrusque suas exponat in oras.
Ambulat innocuus candor, generosaque mentis
Simplicitas, doctosque agitans prudentia sensus,
Nec sapiens, quae vulgus amat. nil castra morantur
Aonides, neuterq́ue suâ cum Pallade Apollo est.
Praesidium doctrina petit, nec noxia cuiquam
Nobilitas faciles poscit per compita gressus.
Ciganei proceres patrijs considere terris,
Et reduces adolere parant altaria donis.
Magna loquar, migrant celebris charissima Leydae
Corcula, & externae clarissima nomina gentis,
Et Vatavae telluris honos. agnoscite Belgae,
Quas dudum servastis, opes, quas odera vobis
Credidit, & nostris formandos misit Athenis.
Scilicet est aliquid peregrinos visere Soles,
Nec tantum sapuisse domi. mens libera quaerit
Exilia, atque foris positum miratur honestum.
| |
| |
Illa Deûm sedes; Superûmque invita penates
Mortali mutavit humo, mox corpore rursum,
Carceribusque abitura suis. cur horreat orbis
Particulam mutare aliâ? cur semper in uno
Stare loco, patriaeque velit se affigere glebae?
Vndique quà geminos tollit, vel deprimit axes
Naturae, mundique labor, quaque incubat undis
Fornicibus domus alta suis, virtutibus ingens
Porrigitur spatium, nec fervens cura sciendi
Sistitur, ulteriusq́ue cupit furor iste vagari.
India bis geniti redimivit tempora Bacchi,
Argolicosque duces, & Graiae nomina terrae
Thessalicus pellexit ager. Tirynthius olim
Hospes in extremis consedit Gadibus heros,
Alcmenae, matrisque satur. defossa metalli
Pondera in ignoto Batavûm solertia mundo
Quaerit, & immensum circumfert vela per orbem.
Non Ithacum tenuere lares, geminosque Mycenae
Atridas, abijt Latio dimissa Iuventus,
Cecropidumque stetit peregrè novus advena portis.
At vos Hercynijs vicinas saltibus arces
Liquistis fortes animae, Belgasque videndi
Causa fuit magno libertas Principe tuta,
Nec victae regionis amor, sacrataque Musis
Limina, & in medijs nascens sapientia bellis.
Non hic fallacis scelerata insania secli
Aspersit labem generi non improba Siren,
Nec Circe potuit castas inflectere mentes,
Aut scelerum suadere modos. dulcissima vitae
Otia Romanae rapuerunt tempora chartae,
Et modo surgentis Romae, modo fata cadentis.
| |
| |
Quin ubi maiores mens volveret ardua curas,
Socratica dulcis Sophiae latuistis in umbrâ,
Aut Themidos sacro didicistis iura recessu,
Et veterum nostro versastis sidere leges.
Nunc Patriae vos cura vocat, blandique penates,
Bellorumque immune solum. iam grande laborum
Terra parens designat onus, subductaque Marti
Imperia, & claros offert respublica fasces.
Illustres virtute viri, nec sanguinis ortu
Degeneres, proavûm nulli splendore secundi,
Felici remeate gradu. nos prospera vobis
Vota damus, fremituque afflamus vela faventi.
Cymothoë placidis calcans vada coerula plantis
Sternit aquas, toto subsidunt aequora ponto,
Assiliensq́ue rati proram levis alluit unda.
Et, quia sacra Deis fratrum concordia, fulgent
Placatos inter Pollux cum Castore fluctus.
Ipse etiam AEolio dimissus carcere sentit
Iussa Deûm, laxatque sinus, & vela secundus
Auster, & à puppi surgens comitatur euntes.
Et iam laeta novos recipit Silesia vultus,
Et dominos vehit Elsa suos, iam Nissa fluento
Luxurians sociâ gaudens lascivit in urbe,
Aggeribusque excussus abit. iam Ciga triumphans
Civiles vestro damnat sub nomine rixas.
Illic consilijs populos, & legibus urbes
Flectite, ad exemplum moderantûm cuncta Deorum.
Seu pacem fortuna dabit, seu barbarus hostis
Inferet Hungaricis funestum finibus ignem,
Et turbata quies districtos porriget enses.
Illic Auriaci magna ornamenta Lycaei,
| |
| |
Et seris victura etiam memorabitis annis
Nomina. ut, Ausoniae decus immortale loquelae,
Vindicet aeternos Batavis Cunaeus honores,
Et Latij genium, & priscas promittat Athenas.
Illic Barlaei faciles in carmina Musas,
Et Vossi facunda mei narrabitis ora.
Mox ubi festa dies hilari decurret Iaccho,
Augustos inter proceres, cognataque vobis
Stemmata, Battavicae referetis robora terrae,
Hinc pelago cinctos populos, hinc milite tutum,
Aut Mosa, Vahalique latus: duo fulmina belli
Nassavios: pulsum obsessis à moenibus hostem:
Occiduis nuper victos in partibus Indos:
Et tandem captae obsidium memorabile Breda.
|
|
Auteursrechtvrij