Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die Ghelressen ter neder getogen worden opten Yseldijc, ende hoe si noch een nederlage hadden omtrent Hoesden; ende hoe si op thuys tot Poroyen quamen.
Dat XXVIII capitel.

Int eerste van november quamen die Gheldersen doer tlant van Vianen, ende wouden in die Dortse Waert wesen om te roven ende te branden. Op dat pas was opten dijc begonnen een starc blochuys te maken tot defensie van dien ende en was noch niet al volmaect; ende daer en lagen op die tijt boven XI of XII knechten niet op, mit een capitein van Dordrecht, genoemt Jan Bloxem. Ende en hadden oec op tblochuys boven X of XII scoten cruyts niet; mer hier en wisten die Gheldersen al niet of, ende alsoet een avontuer was, so wast op dese tijt II oft III dagen lanc een grote storm van regen ende wint. Die Gheldersen vielen voer dit blochuys, in meninge dat te winnen, ende hadden III wagen hoeys gestelt an tblochuys, ende staken dat an, menende dye knechten van den blochuse te verdriven mitten roke; mer die ander weerden hem vromeliken. Here Floris van Yselstein, die lach op dese tijt tot Worichom, ende om des ongetemperden weers willen en mocht hi niet overcomen. Doch dat weder ende tempeest cesserende, quam hi over twater mit een deel volcx te paert ende te voet. Die Gheldersen dit vernemende, dat die here van Yselstein quam, steldent op een lopen, al dat si mochten, ende alsoet

[p. 426r]

seer geregent was ende de dijke slickych was, togen si hair sconen van horen voeten om te vaster lopen, sodat men opten dijck vant staende over M paer scoenen, want si mosten tselve passage uut dat si inghecomen waren. Corts hierna maecten die Gelressen weder een anslach ende quamen mit ponten ende scepen over die Mase omtrent V C starc int lant van Hoesden, om te roven ende te branden. Ende op dese tijt lach heere Florijs van Yselstein tottes Hertogenbossce, ende also als alle dat lant in roere was, slaende die clocken ende al tvolc in die wapen lyep, soe isser in corter tijt een grote menichte vergadert te paerde ende te voet, mitten heer van Yselsteyn ende ander edelen ende capiteinen, uutgetogen tegen dese Gelressen, ende sloegen op dese Ghelressen so vreeslic, datter veel geslagen worden ende tot C gevangen; ende al wikende ende vechtende verdrancker veel, ende quamen mit nauwer noot ewech ende streken na thuys te Poroyen. Ende en had hem thuys te Poroyen nyet open gestaen, twaer te duchten geweest datter al den hoop gebleven soude hebben, want si so starckelic aftervolcht worden, dat si haer ponten ende scepen niet wel crighen en mochten.