Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat heer Willem van Arenburch innam die stede van Tongeren, ende hoe dat hy mit listen ghevanghen wert ende onthoeft.
Dat LI capitel.

Als heer Jan van Huerne, die elect van Ludic, die confirmacie van den paeus vercregen hadde van dat bisdom van Ludic, ende was heer Willem van Arenburch des niet wel te vreden; ende om dese promocie te beletten dat hi immers in der possessien van den steden ende sloten niet comen en soude, heeft hi mit listen ingecregen de stede van Tongeren uuten handen van den Brabanders, verslaende ende vangende vele van den ingeseten ende poorteren van der stede de hi gecrigen conste. Soe wert dair weder opgestelt een groot heer van volc in die Loumaent, ende de hertoge Maximiliaen toech dairmede int lant van Ludic, ende belagen tslot van Huele, dat si nae veel stormens ten lesten opgaven. Als heer Willem dat vernam, quam hi mit groter macht uut Ludic om dat slot te ontsetten, mer hi quam te spade, ende also hi vele starcker was dan die hertoge, so woude hy hem bevechten. Mer by practijken ende listicheden hadden die Brabanders victorie, want dair lagen vele cloeke mannen after een berch geleyt; ende als die Lukenners passeert waren, braken si op ende sloeghen van afteren int heer, so datter omtrent III M Lukenners verslagen werden mit heere Willem van Wachtendonc, mit III C Cleefse, de den Lukenners te hulpe gezonnen waren. Ende heer Willem mitten anderen namen die vlucht ende stondt seer scarp, dat hi ontquam.

Hierna, in den jare van LXXXIIII, so ving heer Frederijc van Huerne, heer van Montigis, heer

[p. 392r]

Jans van Hoerne, biscop van Ludicks broeder, den voernoemden here Willem van Aerdenburch buten die steden van Sint Truden, ende leverde hem te Maestricht; dwelcke hem grote scande ende onere ghesproken wert, want die bisscop mit sinen broeder voorseyt waren verenicht ende gesoent mitten voernoemden here Willem van allen gescillen ende twisten, ende hadden tesamen gheteert in goeden gheselschappe; ende al was here Willem³⁴⁴ een boes mensche gerekent, nochtans behoort men gelove te houden. Als nu here Willem binnen Maestricht gevangen was gebrocht, most hi sterven na den rechten ende wetten van der stede om sijn voirgaende misdaet ende quade feiten, ende wert openbaerlic onthoeft op een scavot, dwelcke namaels swaerlic ende gryselic gewroken wert op die van Maestricht ende den bisscop, van here Everaert sinen broeder ende sijn kinderen ende here Robbrecht, also datter vele castelen ende dorpen verbrant ende verwoest werden, vele volcs verslaghen ende ghevangen werden, ende onverwinlike scaden daerom ghedaen werden.

344 Willemm AB.