Van den groten perikel dair dye prince in stont binnen die stede van Lutsenborch ende van der justicie des heren van Lalleings die hi in Hollant dede.
Dat XXVII capitel.
Op Sinte Odulfs avont reysde die prince van Delft na der stede van Den Briel, want hy sinen tijt lang ghesleten hadde te vergheefs, om twee partien in Hollant te concorderen ende te verenighen. Ende is ghecomen in Brabant ende voert in Vlaenderen. Ende daer wesende vergaerde hi groot volck van wapenen, ende is dairmede ghereyst tegen den Franzoysen, die daghelicxs tlant van Lutsenburch infesteerden ende verwoesten. Wesende binnen die stede van Lutsenburch, wasser een verraet opgestelt ende ordineert tegen hem: mer ten quam tot gheenre effecten, ende wert niet volbrocht. Want dair stont op een scermutsinghe onder sine zoudenieren ende knechten, ende dye zouden den Franchen overghelevert hebben; welck perikel die prince vernemende, reysde haestelick na Vlaenderen, ende liet zijn cappeteynen mitten knechten legghen op dye frontieren ende palen van den lande, omme den Franchoysen te resisteren ende te wederstaen, want si dagelicxs groot scade deden in sijn landen. Omtrent sinte Marien Magdalenen dach began de here van Lelleing sine officie van stathouderscap te exerceren, recht ende justicieGa naar voetnoot292 te doen mit die nyewe raetsluden. So is hi dan ghereyst doir dat lant van Hollant in meninghe te concorderen ende te verenighen dye twee partien ende secten, ende is ghecomen binnen die stede van Hoern mit heer Claes van Adrichom, abt van Egmont omtrent Sinte Bertelmees dach, ende brocht dairbinnen alle dye verdreven waren uuter stede van der Cabbeljauscher partije, uutgheseyt Martijn Velaer, den ouden scout; ende alle dese inghecomen ballingen vielen op hoer knien, swerende ten Heyligen in teghenwoerdicheyt van al dat volck, dat si nu noch tot ghenen daghen na enighe officie oft regiment staen en souden om te impetreren ofte dat te vercrighen. Ende dijergelijcken dede hi mede binnen der stede van der Goude, mer binnen der steden van Dordrecht ende Leyden en mocht hijts niet doen. Dit ghedaen sijnde, reysde hi weder na des sGravenhaghe. Ende corts daerna coft hi die heerlickheit van Lalling ende van Lingecourt van heer Jan van Lalling, broeder van vrouwe IJolente, vrouwe van Bredenrode. In ditselve jaer, omtrent Sinte Cathrinen dach, werden alle die van der Cabbeljauscher partije waren uut die stede van Amersfoert verjaecht ende verdreven.
Auteursrechtelijk beschermd