Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dye grave van Simpol ghevanghen ende onthoeft wert.
Dat LXXXIII capitel.

Buten desen bestande bleef mede gesoent die edele heer Lodewijck van Lutsenburch, grave van Simpol, conincstabel van Vranckrijc, ende was seer mede beducht, ende en dorstet in Francrijc niet onthouden, want hi sorchde van den coninc gevangen te werden ende gedoot. Ende also hi beteren betruwen hadde in den hertoge dan in den coninc, is hi gecomen in dye stede van Bergen in Henegouwen; ende hadde de hertoge²¹⁷ bestelt in allen steden sijnre landen heimeliken an den officieren, wair dat hi quamen, dat men gevangen nemen soude. Dwelc also gesciet is, ende dedent den hertoge weten. Die coninc dit vernemende, heeft terstont gesonnen an den hertoge, begerende dat men hem den grave van Simpol gevangen leveren wilde; dwelck hem die hertoge nyet weygheren en woude. Ende dye cancellier meyster Willem Hugonet heeften ghevanghen ghelevert des conincs dienres op die frontieren van den landen, ende brochten ghevanghen in des conincs prijsoen tot Parijs. Daer wesende, worden hem vele ende diverse causen ende criminele saken opgheleyt, ende bysonder dat hy veel twisten ende discorden ghesaeyt ende gemaect hadde tusschen den coninck ende den hertoghe, des hem vele wise luden verwonderden, dat so edelen ende machtighen prince ende geleerden man sijnre zinnen so beroeft was, ende tot sulker demencien ende ontsinnicheit ghecomen, want hi was baccularius in den waerliken rechten, ende verstont hem seer wel in derselver sciencye; ende was een eerwaerdich, out man van LXX jaren, ende was een man van hogher gheboerten, want hy van den ouden hertoghen van Lutzenburch gheboren ende gesproten was; ende hadde te wive des hertoghen dochter van Zavoyen, dye der coninginne suster van Vrancrijc was. Ende hadde oeck IIII sonen, als enen biscop ende III graven, als van Marle, Vianden ende Ronchi. Als nu die grave voorscreven verstont dat hi soude moeten sterven, begheerde hy stadelicken mit groter instancien om mitten coninck te spreken; mer ten mocht hem niet ghescien. Die coninck, die sijn doot seer begheerlyc was, deden te rechte setten voir den heren van den Perlamente binnen Parys, ende daer wert een processe van recht tegen hem gehouden. De heren van den Perlamente, anhorende die articulen de tegen hem produceert ende gedaen worden, hebben hem priveert ende beroeft van den conincstabelscap, ende voert van allen conincliken diensten, ende wert bevonden in crimine lese majestatis ende adjudiceert ende geordelt dat men openbaerlic onthoefden soude, in der plaetsen genoemt Grene; ende al zijn goeden leggende in der cronen van Francrijck worden confisceert ende tot des conincs tafel geslagen. Dese sentencie wert gegeven van den cancellier des Perlaments tot Parys, genoemt here Peter Doliolle, ridder, tegen den grave Lodewijck van Zimpol, int jaer M CCCC LXXV, den XX dach in december. Aldus wert die grave op een paert geset, gecleet in swarten, ende reet ter plaetsen dair men onthoefden soude, dair een ontallic menichte van volc vergaert was; ende wert aldair onthoeft in tegenwoerdycheden van vele princen ende heren ende veel gewapens volcs; ende zijn lichaem, mitten hoefde, wert begraven als hy begheert hadde totten Minrebroederen. Die edele grave van Zimpol meende II heren te dienen die malcanderen contrarie waren, dwelc

217 hertogo AB.

[p. 359v]

onmogeliken²¹⁸ was om doen, als dat heilige Evangelie bewijst; ende dairom ist int einde qualic mit hem vergaen.

218 naar Tilmans; onmogelken AB.