Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat bestant tusschen den coninc Lodewijc van Francrijc ende hertoge Kaerle weder verlangt wert.
Dat LVII capitel.

Opten XV dach van aprille, in den jare M CCCC LXXIIII, als dat bestant tusschen coninck Lodewijc van Francrijc ende hertoge Kaerle van Bourgondien uutgaen soude, is daer weder enen dach geraemt ende geset binnen der stede van Bouvijn int graefscap van Namen gelegen, om te tracteren van een langer bestant tusschen desen II mogende princen ende heren. Tot welker dachvaert gecomen sijn die aertsbiscop van Riemen, dye aertsbisscop van Lyons ende die here van Traon vanwegen des conincs van Francrijc. Van des hertogen wegen quamen here Willem Hugonet, cancellier, here Willem Bietze, here van Buysy, ende here Pieter Carondilet, president des Perlaments van Mechelen. Dese ambassiaten ende gedeputeerde tesamen vergadert wesende, arbeiden sere naerstelick ende trouwelic om tot enen goeden eynde te comen, ende hebben ten lesten gevonden een remedie om een lang ende vast bestant te maken mit vele articulen ende poncten, uuten welcken dat gescapen was enen vasten pays ende vrede int einde te comen. Mer als sommige wilden seggen, so soude die grave Lodewijck van Simpol uut deser zoene ende bestande secludeert ende gesloten bliven. Dwelke die grave van Simpol verstaende, heeft mitten coninc begeert allene te tracteren, ende dair wert enen determinaten tijt ende dach geset bi Aron in Tierasse; tot welker plaetse die coninck quam mit VI C glavien, ende die grave mit CCCC glavien. Hier is te weten dat III man sijn gherekent voer een glavie na der Franssen manier, ende V voir een glavie na der Duytscher manier. So sijn dan dye coninc ende die grave tesamen allene op een plaetse gereden, ende lieten haer familie ende dienres van verres of staen. Ende als si een wijl tijts int lange tracteert ende gesproken hadden, sijn si elcs weder in hoer plaetse gereyst. Ende terstont sant die coninc enen bode tot Bouvijn, bevelende sine ambassaten dat si in den tractate van bestande niet procederen oft voertgaen en souden, want hi enen anderen manier gevonden hadde om een bestant ofte pays te maken. Die ambassaten des conincs boetscap ende commissie verstaende, waren sere bescaemt, want si so verde in den tractaet van den bestande laboreert ende tracteert hadden, dat si in geenre manieren behouden des conincs ende hore eren, resilieren ende aersselen mochten van tgeen

[p. 342r]

¹⁷⁷ datter diffiniert ende gesloten was; waerom dat si van stonden an opsaten ende reden snelliken bi den coninc tot Riemen, ende narreerden hem al tghene datter getracteert ende gesloten was. Die coninc missaecte sine woorden, ende seyde dat hi hemluden sulcken auctoriteyt ende macht niet mede gegeven en hadde, ende revoceerde alle tgene dat si tracteert ende gesloten hadden als van geenre cracht ofte vigoer te wesen. Die ambassaten van den hertoge togen bi hem in der stede van Lutzenbuch, daer hi noch was, ende ghaven hem mede te verstaen wat si geconcludeert ende gesloten hadden. Waerom dat doer al Francrijc ende sprincen landen die ghemene fame ghinc dattet een openbaer oerloge ware tusschen desen II mogende princen. Nochtans hadden dese commissarien ende ambassaten noch binnen Bouvijn wesende dit bestant verlangt, ende uutgeset bi consent van desen II princen VI weken lang. Mer als si van malcanderen souden sceyden, so extendeerden ende uut setteden si den tijt tot XIIII weken lang, dwelke den coninc ende den hertoge mede nochtans mishagede, ende wert dit bestant nochtans redelic gehouden. So werter nochtans so sere noch in gearbeyt, dattet bestant voorscreven een gans jaer soude dueren ende verlangt wesen, behoudelic dat dye comanscappe in beyden der heren landen gheen ganc hebben en soude. Ende in desen tijden versagen die coninc ende die hertoge alle haer steden, sloten ende fortressen leggende op die frontieren van den lande van tghene dat hen van node was ende si behoeftich waren, ende elck maecte hem starck tegens den toecomende tijt.

177 LXI AB.