Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoge Kaerle die andere steden des lants van Ghelre onder sine subjectye ende onderdanicheit creech.
Dat L capitel.

Na desen vertoech die hertoge mit alle sijn heer ende quam omtrent dat huys te Lobet, daer die Rijn ende Wale van malcanderen gedeilt worden, ende quam opten berch van Elthen int cloester dair hi sine tenten ende pauweljoenen neder sloech; ende dair leggende quamen bi hem die gedeputeerde uuten steden van Zutphen ende van Aernhem mit meer andere steden des lants van Ghelres. Dair wert gesloten ende geconcludeert in des princen rade dat si den hertoge rustelic ende vrelic ontfangen souden voer horen here ende hertoge, behouden alle hoer privilegien, vryheden ende hantvesten mit meer andere condicien. Ende opten III dach van Oest wert die¹⁷⁰ hertoge mit groter eren tot Zutphen in die stede gehaelt, ende hulden ende ontfingen hem voer enen hertoge van Ghelre ende graef van Zutphen. In der stede van Zutphen wesende, quamen die gedeputeerden van den Over-Yselsscen steden, als Campen, Swolle ende Deventer, ende verenichden hem metten hertoge, want hi op dese steden vertoernt was, omdat si mitten Gelressen hem verbonden hadden tegen hem. Op dese selver tijt brocht hi oec tot sijnre onderdanicheit here Oswalt van Oldenburch, wiens heerlicheit geleghen was tusscen Zutphen ende Emmeric. Ende die hertoge dede vergaderen alle der ingesetene poorters van Zutphen harnas ende strijtber instrumenten ende alle hoir artelrye op ene plaetse, ende gaf die sine zoudenieren die hi daer liet om die stede te bewaren; ende vandaen toech hi in die stede van Aernhem, ende wert daer mede als hertoge van Ghelre gehult ende ontfangen. Doen quamen alle die ander steden des lants van Ghelre, als Harderwijc, Grol, Dothecom, Hattem, Elburch, Doesburch ende andere steden, ende hulden hem mede als enen here ende hertoge van Gelre. Ende aldus wert hi mit groten arbeyde ende moyenisse hertoge van Gelre ende grave van Zutphen. Ende hi sette in allen steden ende sloten vrome, cloeke capeteinen om die landen in subjectie ende onder sine onderdanicheit te houden, settende een grote scattinge over dat lant om den cappeteinen ende knechten te onderhouden ende te betalen. Ende sette ende ordineerde binnen der stede van Aernhem sine consistorye ende raetcamer, daer hi in ordineerde ende sette sinen raet ende regenten, die enen ygeliken recht ende justicie souden doen uut sinen name. Ende van desen heren van den rade maecte hi sinen stedehouder ende president van dat gehele lant van Ghelre here Willem van Egmont, here van Yselstein. Ende onder hem ordineerde hi here Adolf van der Marck, doctoer in den rechten ende ridder des hertogen neef van Cleef. Ende hertoge Kaerle quam weder binnen Niemagen op Onser Vrouwen Hemelvaertsavont; ende als hi alle dingen ende saken in goeden puncten ende state geordineert hadde, reysde hij vandaen na Maestricht. Ende daer wesende be-

170 die die AB.

[p. 337r]

geerde hi te versoeken Onser Liever Vrouwen beelde tot Aken; ende comende by der stat quamen die overste van der stat hem te moete, presenterende die slotelen van der stat, dat hij sere danckelic nam, ende leiden hem met groter eren in der stadt, ende bleef daer een weynich tijts leggen, hebbende bi hem alle sine capelle van der musyke ende meestersangers, die alle dage tot eren der Moeder Goeds eenen sconen dienst ende officie deden in muysyke voer dat voorscreven beelde. Ende dat grote heer lach buten der stat in tenten ende pauweljonen, want si alle in die stadt niet legghen en mochten.