Van den groten twist ende discoorde dye geresen was tusscen hertoge Phillips ende sinen sone, den grave van Charloys.
Dat XL capitel
Als nu grave Kaerle van Charloys heere Jan van Koestein hadde doen onthoefden, nam hi alle sine costelike cleinoden, scat ende ghelde tot sijnre eygen profiten. Dit vernemende die grave van Stampus ende here Jan van Croy, opperste raetsheren van den hertoge, namen dat sere oevel ende qualiken, want si sere beminden heren Jan voorscreven. Ende si excuseerden hemselven dach ende nacht van deser opsette ende boesheden, perpetreert ende gedaen bi heren Jan, ende dat meer was, si diffameerden ende besculdichden den grave van Charloys also tegen sinen here vader, dat hij hem sien noch horen en woude, ende geboot oec uut groter toernicheit dat men hem vastlegghen soude. Die grave dit int secreet ende sekerlic verstaende, gaf den toernicheit een stede, doende als die wise, ende reysde uut sijn vaders ogen, ende quam in sine landen ende steden van Gorichom, hoewel die hertoge vele lagen in diverse plaetsen hadde doen leggen om hem te vangen. Ende want hi dat nyet gedoen en konde, nam hi voer hem te vangen die raden ende heren Kaerls sijns soens, dwelc hem oec wel kenlic was; waerom hi altijt bewaert ghinc mit vele familie ende dienres. Hi hadde oec allen edelen, heren ende knechten verboden ghene communicatie noch conversacie te hebben mit sinen sone op die verboernissen van lijf ende goet, waeromme si hem ontsagen openbaer mit hem te converseren, uutgeseyt here Adriaen van Borselen, here van Brigdam, ende meester Anthonis Michiels soen, raet van Hollant, wonende in Den Hage. Dese here Adriaen hadde te wive Anne, hertoge Phillips bastert dochter ende grave Kaerle van Charloys' suster, waerom dat hi bi den grave stadeliken bleef, hopende altijt int einde, als die vader ende tkint versoent souden wesen, dat hi oec wel lichtelic tot payse geraken soude. Hertoghe Phillips vernemende dat meester Anthonis, raet van Hollant, dye een out man was ende sijns soens opperste raet, sant sommighe dienres in Den Haghe die hem gevangen brengen souden tot Brusel, ende daer hebben doen rechten. Ende als si meester Anthonis gevangen hadden, terstont deden si dat heimelic weten den grave van Charloys, ende dat hi sine dienres senden soude ter plaetsen daer si souden passeren, ende dat si hem dye mit machte benamen. Dwelc also gesciede; want desen comende mit haren gevangen, quamen des graven dienres wel die helfte starcker omtrent Dordrecht, ende namen hem mit crachte, ende brochten tot Gorichom, ende die ander toghen weder na Brusel; waerom dat die prince seer verstoert was, ende leyde noch veel scarper lagen om sinen sone te vangen. Mer hi was altijt so bewaert mit sine archyers ende dienres, dat si hem nyet lichtelic vangen en mochten. Mer die hertoge dede confisceren alle sine goeden, heerlic ende eygelic, dat hi niet en behilt, dair hi sinen staet ophouden mochte ende leven. Ende daerenboven benam hem die coninc Lodewijc van Vrancrijc alle datghene dat hi hem daer gegeven hadde, doen si verenicht waren; waerom dat vele edelingen ende sommige van dye Hollantse steden hem al heimelic bystant deden, ende bysonder here Franck van Borselen, grave van
Auteursrechtelijk beschermd