Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat here Ghijsbrecht van Bredenroede, domproest van Uutrecht, gecoren wert eendrachteliken die LIIII biscop tUtrecht⁵¹.
Dat XXIII capitel.

Als bisscop Roelof van Uutrecht gestorven ende begraven was, sant die mogende prince hertoge Philips van Bourgondien den grave Jan van Nassouwen mit enen costlijken state tot Uutrecht, begerende van der ecclesye van Uutrecht dat si heren David, biscop van Terewaen, sinen natuerliken soen, kiesen wouden tot enen biscop van Uutrecht. Hertoge Aernt van Gelre quam selver in persone, ende badt voer hertoge Steven in Beyeren, canonic in den Domkerke tot Colen. Den dach van den electien ende coren wert geleit, ende die capitelaers van den V Godshusen, angeroepen hebbende die gracie des Heiligen Geest, coren eendrachteliken mit gemenen stemmen here Gijsbrecht van Bredenroede, domproest van Uutrecht, die een wijs ende verstandel man was; uutgenomen II van den canonicken, als here Gerrit van der Massce⁵², ende here Jan van Witenhorst, coren heren Steven van Beyeren voorscreven; ende als si hoerden dat alle die ander stemmen ghingen opten domproest, wederriepen si hoer stemmen ende gaven die mede here Ghijsbrecht, den domproest. Ende dit gescyede des manendages na Paeschdach, ende was den VII dach in aprille. Ende aldus so was dan dese here Ghijsbrecht van Bredenroede eendrachtelic gecoren die LIIII biscop van Uutrecht⁵³, ende regeerde dat als een waerlic heer een jaer ende IIII maenden. Ende desselven zomers, uut gemenen rade der regenten ende der dekenen van den ghilden ende der oversten van der stadt, wert hi mit groter feesten ende eren gebrocht in der stat, ende geset in des biscops hof, om daer te resideren ende wonen als enen heer ende bisscop van Uutrecht. In desen tiden regneerden sere binnen der stat van Uutrecht die ghilden ende dat gemene volc, daer luttel geloven ende betrouwen op te setten is. Mer hi brochtet mit wijsheden ende goetheden daertoe dattet den burgeren geliefde als dat die here van Bredenroede, sijn broeder, joncheer Jacob van Gaesbeeck, die domproest, Jan van Renesse ende meer ander goede mannen die uuter stat verdreven waren, alle weder inquamen ende hi dede se alle bi hem comen, ende oec alle die die stadt te regieren hadden, ende bat se van beiden siden ten eten. Ende als hi een lange relacie hadde gedaen, bat hi hem allen dat si wesen wouden een; hi woude hen wesen een goet heer ende harder. Ende si beloefden hem also te doen; ende daer was grote bliscap van alsulken eendrachticheit. Mer dieghene die die stat geregeert hadden, siende dat diegene die weder ingecomen waren verheven worden, bestonden te duchten ende ghingen altemet uuter stat, ende pijnden hem te comen tot Amersfoert; want de ingecomen ballingen hen te starc ende te machtich waren, ende oec wisten si wel dat die van Amersfoert niet goet en hadden opten elect van Uutrecht, here Ghijsbrecht voorscreven. Dye elect van Uutrecht, here Ghijsbrecht, sende terstont na sine electie an den paeus Calixtus die III sine notabele ambassaten, wise ende verstandele mannen, heren ende meesters, als Willem Paeds, Alfert van Montfoert, Evert van Zoudenbalch, Harman van Rijn, Dirc uuter Weer ende Ludolf van Horen, om die confirmacie, ende dede sijn penningen presenteren die dair van outs toe staen, te weten IIII M ducaten. Ende dese penningen geset op de wisselbanke, opdat dair ijmmers geen gebrec in vallen en soude. Die paeus ontfinc die penningen, mer hij en gaf nochtans die confirmacie niet, als na geseyt sal worden. Die elect sende mede sijn oratoren ende ambassaten an keiser Frederick die III

51 tutert AB.

52 aldus B; Massee A; Massche C.

53 Uttecht AB.

[p. 296v]

om dat regale ende waerlijcke swaert des bisdoms van Uutrecht; ende die keiser sendet hem.