Van die rebellicheit der poorteren van Gorichom, ende hoe si daer om gepuneert ende gecastijt worden.
Dat XXI capitel.
Int jaer van LIIII, die grave Jacob van Horen, here van Woudrichom ende van Halthena, merckende dat die ingeseten van GorichomGa naar voetnoot50 onderlinge twist ende kijf hadden, begeerde van die van Gorichom te hebben die vischerie van der Merwen, allegerende dat si hem van rechtswegen toebehoerden. Die van Gorichom seiden weder, dat se hem in voerleden tiden van sinen ouders ende voersaten gegont ende gegeven waren, waerom dat se die grave dede cyteren mit een mandament voer den Raet van Hollant in des Graven Hage. Ende also si niet en compareerden ende trecht versmaden, worden si verwonnen. Ende die grave verwerf an den Raet, datter enige van den heren van den Rade gedeputeert worden, om die van Gorichom te inhyberen ende verbieden die visscherie van der Merwen. Die van Gorichom dit vernemende togen den deputeerden te moet, ende verveerden se also, dat si weder togen na Woudrichom, ende vertelden den grave wat hen gemoet ware; ende comende in Den Hage narreerden den Raet hoe si mit de van Gorichom gevaren hadden. Ende raet nemende mit malkander quam die here van Lannoy, stedehouder van Hollant, subtijliken in die stede van Gorichom op Onser Liever Vrouwen avont in den Advent, mitten joncheer van Gaesbeeck; mit here Ghijsbrecht van Bredenroede, domproest van Uutrecht; Gyelis van Wijc, castelein van Huesden; Jan ende Claes, bastertsonen heren Dircs van der Merwen; Simon Aernts soen, baelju van Scyedam, ende vingen vele van den poorters. Ende daer worter III van desen gevangen scandeliken of onthoeft, die nochtans deser saken ontsculdich waren. Ende die andere worden gebannen, ende vele mosten hem mit grote sommen van penningen weder quiten ende lossen.
Auteursrechtelijk beschermd