Hoe Scoenhoven gewonnen wort ende Albert Beyling levende bedolven.
Dat XXVIII capitel.
Vrouwe Jacobe in Henegouwen wesende, heeft vernomen hoe dat hertoge Jan van Brabant gehult ende ontfangen ware in den lande van Hollant, Zeelant ende Vrieslant, was si seer qualicken te vreden dat si also van haer vaderlycke erve versteken ende vervreemt soude wesen, waerom si avijs ende raet gehadt heeft mit haren secreten vrienden, hoe si in enyger manieren enige sloten of steden in Hollant in souden crigen ende onder haren macht brengen; waerom si ghesonnen heeft Floris van Kijfhoec mit meer gewapens volcs, dat hy dye stede brenghen soude onder sine subjectie ende heerscappie. Dwelc also is gesciet bi hulpe ende toedoen van zommighe poerters, die goet vrou Jacobs waren; mer dat slot en creech hy nu niet, mer hi heeft dat slot van stonden an mit sijn heer ende mitten poorteren crachtelicken al om beleyt also wel dat buten de stede als van binnen VI weken lang, ende creech van stonden an dat voerburch van den castelen ende zommige bolwercken. Ende dese vercregen hebbende, bestormde hi dat slot mit menige assaulte ende instrumenten. Opten huse waren cappeteinen Willem die Konster ende Aelbrecht Beyling mit noch vijftich vrome wapentuers, die hemselven begeerde te bescermen stonden se weder, seer bedroeft wesende, also lange dat si van nootswegen bi gebreke van vitaelge behouden haer lijf dat opgaven, uutgheseyt Aelbrecht Beyling, dye ghehouden wort tot vrou Jacobs behoef. Ende hem worde uutsettinge gegeven een maent lang, ende zijn lijf dien tijt versekert, dat hi soude mogen gaen visiteren sine vrienden, eerst doende enen eet weder in te comen. Ende als hy een maent geleden wesende wederom quam, worde hy in der nacht al levende op enen molewerf begraven.
Auteursrechtelijk beschermd