Hoe hertoge Jan van Beyeren oflyvich worde ende hoe hertoghe Jan van Brabant in Hollant Zeelant ende Vrieslant ghehult worde.
Dat XXVII capitel.
Als hertoge Jan van Beyeren dye brieven van hertoge Jan van Brabant ontfangen hadde, versoekende assistencie ende hulp te hebben tegen den hertoge van Cloucester, dede hy hem weder weten, indien hi gesont waer, hi soude den XXIII dach nae dat mi des briefs by hem wesen, mit veel volcx van wapenen. Ende als nu hertoge Jan van Beyeren een groot machtich heer van volc hadde vergadert, wert hi scielicken sieck opten XIII dach, als hi reysen soude, ende starf opten Heyligen Dertienen dach des smorgens in der dageraet in Den Hage, ende wart begraven int cloester totten Jacopinen, an die zuytside van tchoer, als hi dye landen VI jaer als voecht ende momber hadde geregeert int jaer M IIII C ende XXIIII. Ende als hertoge Jan ghestorven was, soe vergaderden alle sine fautoersGa naar voetnoot564 ende goede vrienden, diet mit hem hadden gehouden, ende concludeerden eendrachteliken dat si hertoge Jan van Brabant ontboden, ende deden hem hulden in allen steden ende dorpen van Hollant, Zeelant ende Vrieslant als horen rechten grave ende voecht van haren geboren lantsvrouwe Jacobe, nyettegenstaende dat si van hem was ghesceyden ende hadde den hertoge van Cloucester getrouwet. Ende als hertoge Jan over allen steden gehult ende ontfangen was mit groter eren ende triumphen als een wettige voecht ende momber van vrou Jacobe horen lantsvrouwe, heeft hy daer in den landen constitueert ende geset enen stedehouder, joncker Jacob van Gaesbeec, heer van Abcoude, van Wijck te Duersteden, van Putten ende Strenen, ende erfmaerscalck des lants van Henegouwen; ende hi toech weder nae Brabant.
Auteursrechtelijk beschermd