Hoe dye coninc van Vrancrijc Kaerl dye VI oflivich worde, ende Henric, coninck Henricxs zoen van Engelant, coninc van Vrancrijck ghecroent wort.
Dat XX capitel.
Int jaer Ons Heren M IIII C ende XXII, doen worde oflivich Kaerle, die VI coninc van Vrancrijc, als hi XXXIII jaer dat conincrijck eerlic hadde regiert, bevelende sinen princen ende heren dat coninc Henric die V, coninc van Engelant uuten name van sinen zoen, oec geheten Gerit, geboren van sine dochter Katrine, zijn huysvrouwe, cronen souden tot een coninc van Engelant; ende wilde dat sijn eygen sone, geheten Kaerl die Dalphijn, van der cronen van Vrancrijc gealieneert, vervreemt ende onterft soude wesen om die verradelike moert ende dootslach, dye hi hadde laten doen an hertoge Jan van Bourgongen. Ende aldus worde dese Henric coninc van Engelant doir zijn eygen mogentheit ende assistencie ende bistant hertoghe Phillips van Bourgongen, hertoge Jans soen, tot Riemen in der stat geconsacreert ende gecroent uuten naem van sinen zone coninc van Vrancrijc. Ende Kaerl die Dalphijn, broeder van dese coninginne van Engelant, die dit seer moeide dat hi aldus van der cronen van Vrancrijc onterft ende versteken was, doir raet sijnre heren ende princen, dede hem cronen coninc van Vrancrijc, int lant van Dalphinoijs. Dat niettegenstaende, so vercreech dese coninc Henric, bi hulpe ende bistant hertoghe Philips van Bourgongen, dat meeste deel van der cronen van Vrancrijc onder zijn subjectie. Om welke sake dat edele conincrijc van Vrancrijc al te deerliken worde gedestrueert ende verderft, vele steden, castelen, sloten ende dorpen verbrant ende terneder geworpen. Ende dit duerde wel XIIII jaeren lang, binnen welke tijden vele baroenen, princen, heren, ridderen ende vele vrome oerloechsluiden gedoot ende geslagen worden. Ende als dese jonge Henric out was geworden XII jaren, worde hi tot Riemen geconsacreert, gewijt ende gecroent tot een coninc van Vrancrijc, in tegenwoerdicheit van hertoge Philips van Bourgongen ende vele edele hertogen, graven ende princen, ende worde gheheten Henric die VI, coninc van Vrancrijc, Engelant ende Hijerlant; ende hi dede hem dairvan noemen ende verwapenen, ende dede oec slaen nyewe goude pennighen, mitter selver titelen.
Auteursrechtelijk beschermd