Van den doot hertoge Phillips Lehardy van Bourgongen, etcetera.
Dat III capitel.
In desen tiden, als int jaer M CCCC ende IIII, worde mede oflivich Phillips Lehardy, hertoge van Bourgongen, grave van Vlaenderen, van Artoys, etcetera. Dese hertoge Phillips hadde in sinen leven gemaect ende geordineert sine III sonen, wat elck na sijnre doot hebben ende besitten soude. Jan van Digon, sine outste soen, hadde hi gemaect dat hertoechdom van Bourgongen, dat graefscap van Vlaenderen, Artoys, Bourgongen ende die heerlicheit van Salijns ende Malijns. Anthonis, sinen anderden sone, hadde hi gemaect na vrouwe Johannen sijnre moyen doot dat hertoechdom van Lottringen, Brabant, Limburch ende dat marcgraefscap des Heyligen Rijcs, als Antwerpen mit sinen toebehoerren. Phillips, sinen III sone, hadde hi gegeven die graefscappen van Nyvers, Rethers ende Retheloes, mit meer andere heerlicheden. Dese hertoghe Phillips starf te Halle in Brabant opten XXVI dach van Aprille, ende worde mit groter eren ende costelicken uutvaert gebrocht ende begraven buyten Dygioen in Bourgondien in een Cartuser cloester, dat hi selver hadde ghefondeert; ende des jaers daerna starf vrouwe Margriet, sijn wijf, grave Lodewijcs van Vlaenderen enighe dochter, ende worde begraven te Rysel, bi haren vader. In ditselve jaer verdreven die van Ludic here Jan van Beyeren, haren elect, uuter stat van Ludic, mit alle dyeghene dyet met hem hilden, omdat hi so lange dat bisdom van Ludic als een waerlic man hadde geregeert, ende dat hi gheen priester worden en woude, dair veel verdriets ende leets ende veel quaets van strien ende oerlogen na om ghecomen sijn, ende dat Sticht van Ludic seer om bedorven ende destrueert worde, vele luyden gevangen ende gheslegen, dat seer te beclagen was in dyen tiden.
Auteursrechtelijk beschermd