Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 241r]

Anno M.CCCC.
Keyseren.

Robbrecht, palsgrave opten Rijn ende hertoge van Beyeren, worde van den koervorsten tot enen Roemschen coninc gecoren, als Wentzelaus voerseit, overmits sine onachtsaemheyt ende quaden leven, ghedestitueert ende van den Rijcke ofgheset was. Dese Robbrecht worde tot Coelen in den Dom tot enen Roemschen Coninc van den biscop Vrederic van Coelen mitter yseren cronen gecroent, want die van Aken hem niet toelaten en wilden, omdat si Wentzelaum ontfangen ende enen eedt gedaen hadden, dat hem namaels qualic bequam. Nochtans hulden si hem daerna int jaer M CCCC ende VI. Hi was een rechtvaerdich ende goet kersten man, want Aristotiles, die seyt int achte boeck Ethicorum, dattet gheen coninc en is die in allen doechden gheen excellenci en doet. Ende Salomon seyt in Proverbijs int XX capitel, dat barmherticheyt ende waerachticheit bewaren⁴⁹⁰ den coninc. Hi wert geconfirmeert van Bonifacio, paeus, den IX. Hi hadde een groot oerloge teghen den bisscop Jan van Ments; ende als si te samen enen strijt souden vechten, starf hi tot Oppenheym, ende wert tot Heydelbergen⁴⁹¹ begraven. Hij regeerde dat rijck X jaer lang.

490 bawaren AB.

491 Heyldelbergen AB.

Anno M CCCC ende X.

Segemont, Kaerls die IIII ende keyser van Romen, coninc van Bemen soen, was eerst coninc van Hongarien ende Bemen, wert in dit jaer van X van den koervorsten eendrachteliken gecoren tot enen Roemschen Coninc. Hi was een goet ende alten kerstlicken vorst, devoet ende goet van leven; hi heeft die Heilige Kercke, die in groot liden, druck ende tribulacie was, ende die volna mistroestich geworden was, te hulpe gecomen mit sijn wonderlike cloecheyt ende wijsheyt. Hi en spaerde noch lijf noch goet om die Heylighe Kercke tot eendrachticheit te brengen. Hi reysde selver in persone in Vrancrijc, in Spangen, in Enghelant, ende van dene stede totter anderen om te maken een Concilium dat die Heilige Kercke weder tot enicheit comen mochte. Hi street IX striden tegen den Turcken, dair hi altijt victorie of hadde. Daerom is hi boven veel keyseren ende coningen gepresen, ende niet minre geacht dan Carolus Magnus, Theodosius Constantinus ende Otto: tsi in machte, doechsaemheit ende goedertierenheit. Hi wert te Romen van Eugenius die IIII gecroent mit groter solemniteiten. Hi hadde als coninc van Hongarien ende Bemen gheregeert XXIII jaer, ende dat keiserrijc XXVII jaer. Ten lesten starf hi int jaer M CCCC XXXVII, ende wert tot Veradinen begraven, als hi begeert had in sijn testament.