Hoe hertoge Willem zijnre sinnen bijster worde, ende hoe die biscop van Uutrecht dye stede van Hardenberch dede bemueren.
Dat XVI capitel.
Int jaer Ons Heren M CCC ende LVIII, op Sinte Jorijs dach, doe hadde Eduwaert die III van dier name, coninc van Engelant, een groot ende feestelick hof beroepen, ende gaf alle sine princen, heren ende baroenen van den lande enen costeliken maeltijt. Tot welken hove hertoge Willem van Beyeren, palensgrave opten Rijn, grave van Henegouwen, van Hollandt, Zeelant ende Vrieslant mede gheroepen ende ontboden was, ende worde mit groter eren ende triumphen van den coninc ende die coninghinne zijnre moyen ontfangen. Welcke feest voleynt wesende, is hi weder gereyst in Hollant, ende worde corts daerna zijnre sinnen bijster, ende is rasende geworden. Ende also hij alle sine dagen een streng heer ende graef hadde geweest, so dode hij ende sloechter mit sijn eygen hantGa naar voetnoot439 ter doot enen vromen edelen ridder, geheten here Gerrit van Wateringen. Ende hertoge Willem worde geset in vaste sekere hoeden ende bewaernissen, ende sat dairin omtrent XIX jaer lanc, totdat hi starf, als hi die graefscappen hadde gheregeert omtrent VII jaer. Ende IIII jaer hierna starf vrouwe Machtelt zijn huysvrouwe, die graefinne, ende leit tot Reinsburch int cloester begraven. In ditselve jaer dede here Jan van Arkel, biscop van Uutrecht, omgraven ende bemuren mit toirnen ende blochusen dat stedeken van Herdenberch, gelegen int Oversticht. Ende hi liet ofbreken ende te niete doen enen groten berch die omtrent die stede lach; ende als men seit, so plach op desen berch hier voirmaels een scoen coninclic pallaes te staen, datwelke die heiden ende ongelovigen gedestrueert ende vernyelt hadden.
Auteursrechtelijk beschermd