Van die strijden tusschen die van Uutrecht ende den Hollanders.
Dat XII capitel.
Int jaer M III C XLV heeft grave Willem van Hollant vergadert een scoen suverlic heer van volc van wapenen om OestVrieslant te brengen onder sine subjectie ende dominatie. Ende als alle dinc was bereit dat tot deser heervaert van node was, heeft hy eerst om enigerhande idele woerden die stat van Uutrecht ontseit. Ende daer is een dach besceyden, dat beide pertien comen souden mit heercrachte op een scoen groen velt, om te vechten een stryt, ende om te vercrigen den zege ende lof der victorien. Dye van Uutrecht sijn seer stouteliken mit blinckende bannieren totter plaetsen daer men striden soude gecomen; daertegen is grave Willem mit ludende trompetten uut sine tenten hem tegemoete gegaen, om te vechten om die overhant. Ende daer geviel een groten strijt, also datter veel an beyde sijden ghequest ende doot bleven. Mer ten lesten worden die Stichse verwonnen ende ter neder getogen. Ende beclagende van den groten misvalle, sijn si weder vergadert opten Marendijc tusschen Uutrecht ende Montfoert, ende bestonden noch een bitteren strijt te vechten tegen den Hollanders. Dese twe partien dus vromeliken ende naersteliken tegen malkanderen striende om dye prijs ende overhant te houden, so sijn nochtans, overmits gehenghenisse Goods, dye van Uutrecht weder verwonnen, ende dye grave heft dat velt, eer ende victorie van den II striden gehat ende behouden.
Auteursrechtelijk beschermd