Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Een mirakel van den Heyligen Sacrament tot Aemstelredam.
Dat X capitel.

Int jaer Ons Heren M III C XLV, des dijnsdaghes voer Palmenzonnendach, was een siec, cranc man leggende in zijn bedde tot Aemstelredamme, ende begeerde te ontfangen van des priesters handen dat Heylige Sacrament. Die priester is gecomen omtrent vespertijt mitten Heiligen Sacramente, ende berechte den sieken man. Ende ontfangen hebbende, is dye sieke man na der sonnen onderganck een qualicheit overghecomen, ende began uuten monde over te geven. Die vrouwen, dye desen sieken man bewaerden, besorcht wesende omdat hy dat Heylige Sacrament ontfanghen hadde, namen een scoen reyn vat, daer sijt in ontfingen, dat hy overgaf; ende gotent in een groot vyer, dat daer lach ende brande om des sieken man wille. Eén van den vrouwen die daer des snachts geslapen hadde, als si opgestaen was ende haer kint gecleet hadde, creech si so groten coude in alle haer leden, dat si bi dat vier most gaen sitten om haer te warmen. Aldus sittende bi den viere, ende dat vyer omroerende om te bet haer te warmen, sach si middel int vier ene scone witte ende hele hostye, als sij ye haer daghen in den handen des pryesters hadde ghesien an den outaer. Die vrouwe verscricte, ende stack haer hant sonder enighe vervaernisse in dat vier, ende nam die hostie in haer hant, sonder haer hant van den viere te quetsen ofte barnen, ende voelde dat dye hostye cout was; ende leydet van die ene hant in dander. Ende alsdoen sach si bescheydelyck, dat dye hostye, die te voren wit ende claer was, wonderlick verandert worde in enen anderen formen ende gedaente als verbrant wesende. Dese vrouwe worde vervaert, ende riep een ander vrouwe, die mit haer woende ,int selve huis, ende seyde: 'Siet, ick hebbe hier in mijn hant dat Lichaem ons Heren Jhesu Cristi, dat ick

[p. 207r]

mit minen handen uuten vyere genomen hebbe.' Ende si gaft den vrouwe oec in haer hant. Ende dese vrouwe leyde dat Heylighe Sacrament op een cussen, ende beslotet in haer kiste. Een uijr daerna quam die man van den huse te huys, ende si vertelde haren man al datter gesciet was. Die man vraechde waer si dat Heilige Lichaem ons Heren hadde geleit. Sy seyde: 'In myn kiste.' Ende hy begeerdet te sien. Siende, nam hi dat in zijn hant mit sinen vingeren. Angetast hebbende docht hem dat dat Heylige Sacrament in zijn hant sienlyc op ende neder spranc. Dat siende, gaf hi sijn wijf dat Heylige Sacrament weder. Ende het behilt die litteikenen van den antasten van den mans vingeren. Ende die man wart seer vervaert, ende hi ginc, ende gaft den priester te kennen. Ende vertelde hem al datter gesciet was, ende wijsden hem daer dat Heilige Sacrament, leggende in der kisten. Die priester versuchte hem, ende nam dat Heilighe Sacrament, ende leydet in een doese, ende brochtet in der kerken al heimeliken, dattet niement en wiste. Des anderen dages, als die vrouwe tot haer kiste quam, vant si daer weder dat Heilige Sacrament opten doec in der kisten. Ende si ging weder totten priester, ende seidet hem; die welke noch eens quam mit dye doese, ende leydet daerin, ende brochtet al heimelic weder in die kerke. Opten derden dach quam die vrou weder, ende vant noch weder dat Heylige Sacrament in haer kiste opten doec, legghende op een scoen wyt kussen. Doe lyep die vrouwe weder totten priester, ende gaft hem te kennen. Als dye priester dat hoerde, docht hy dat God dit myrakel verkondicht ende openbaer gemaect woude hebben, dede dit te verstaen alle priesteren³⁹⁸, geestelic ende waerlic, binnen Amsterdamme, ende si quamen in hair religie mit crucen ende mit vanen ter heyliger stede, daer dat Heilige Sacrament ghevonden was, ende brochtent mit love ende mit sange, mit groter eren ende waerdicheit in die prochikerke. Dye man van deser vrouwen, dye sijn wijf verboden hadde dese miraculen te openbaren ende niemens te seggen, sittende II dagen hierna bi den vier, hebbende³⁹⁹ een jonc kint op sijn scoot, berispende sijn wijf dat dese dingen doer haer int licht gecomen waren ende geopenbaert. Terstont dat kint, dat hi sittende hadde op zijn scoot, is eenmael vreselic besiect geworden mit dat vallende tuel, ende noch terstont twemael after een, ende worde seer ende vreselic gequelt, ter tijt dat die man ende sijn wijf doer raet ende ingeven haerre vrienden beloofden te versoeken dat waerde Heilige Sacrament mit haer offerhande in der kercken, wollen ende barvoets. Daerna gescieden vele grote miraculen van siecten, van onrechte gevangen ende veel andere, die lang zijn te scriven.

398 presteren AB.

399 hebbenbende AB.