Van Johan van Arkel, die XLVII biscop van Uutrecht.
Dat VIII capitel.
Die paeus Clemens die VI, als hi ghecoren was te wesen paeus van Romen, versach hi ende gaf enen edelen man van gheboorten geheten Johan van Arkel dat bisdom van Uutrecht, dat op de tijt vaceerde ende open stont; ende worde aldaer geconsacreert ende gewijt van here Ganzelijn, cardinael ende biscop van Albanen, te wesen die XLVII biscop van Uutrecht; dit gescyede int jaer M III C ende XLII. Johan van Arkel, here Johans soen van Arkel die XII, als hi gheordineert was van den paeus biscop van Uutrecht, heft hem gehaest neder te comen, ende is mit enen betaemliken staet van ridderen ende knechten opten VIII dach van mey int jaer van XLIII gecomen binnen der stat van Uutrecht, ende is na ouder gewoenten mit groter eren ende feesten geset in des byscops stoel. Dese heren Johans broeders waren: Otte, here van Arkel; Aernt, here van Zoelen, Avesaet ende Noordeloos; Robbrecht van Arkel, naemaels heer van Asperen; Herbern, here van Slingelant. Dese here Jan van Arkel, biscop van Uutrecht, een jonc man, in sine joechdelike tijt bloyende, heeft dat gehele bisdom met diverse ende menigerleide becommernissen ende sculden beswaert ende beladen wesende gevonden, mit dat gansse Oversticht, uutgeseit alleen die stede van Campen, ende die sloten ende husen des Nedersticht, verset bevonden an menigerhande personen. Ende in dat eerste jaer zijns bisdoms heeft hi dat casteel van Stoutenburch, dat wel-
Auteursrechtelijk beschermd