Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dye goede graef Willem oflivich worde, ende van die goede informacij ende onderwisinghe dye hi sinen sone leerde.
Dat XXXIII capitel.

In den jaer M III C XXXVII openbaerde hem een grote comete; ende in datselve jaer worde die goede graef Willem mit groter siecten beswaert, ende dede tot hem comen die grave van Oestervant, sinen sone. Denwelken hi onderwees ende leerde God van hemelrijcke boven al te beminnen ende te vresen, ende dat hi ymmers recht ende justicie dede, ende dat hi sine landen ende ondersaten in rusten ende vrede houden soude; ende dat hy dye niet scatten noch mit enige nyewer opsetten beswaren soude, ende dat hi die geestelicke personen niet overvallen noch moyelick wesen en soude, ende andere vele goede leringe ende onderwisinghe. Ende die goede grave worde van dage te dagen sieker, ende gaf God den Here sinen geest op den VII dach van junio, nadat hi sine landen van Henegouwen, Hollant, Zeelant ende Vrieslant rustelic ende vromelic hadde geregiert XXXIII jaren; hi was een prince seer victorioes in striden, seer gepresen in steken ende tornyeren, ende vrunctlic, minlic ende ontfanclic in allen heren hoven ende geselscappen.

[p. 203r]

Ende worde seer eerliken ende feesteliken begraven in die stede van Valenchyn in Henegouwen. Ende Johanna, zijn huysvrowe, die graefinne, heeft na haer mans doot die werlt ende al datter in was om Goods willen aftergelaten, ende is gegaen in een cloester van der Cistercien oerden, geheten Fontanille, ende is gheworden een nonne, ende heeft God van hemelricke aldaer mitten anderen religose vrouwen ende nonnen naersteliken ende vijrichliken ghedient. Ende is aldaer gestorven ende begraven int jaer M III C ende XLII.