Hoe die heerlicheit van Hoesden vercoft worde.
Dat XXXI capitel.
In denselven jaer van XXXIIII starf here Jan, die XX heer van Hoesden, sonder kinderen. Dese here Jan, doer ingeven heren Jans van Elshant ende des heren van Cranendonc hadde die heerlicheyt, stede ende slot van Hoesden vercoft hertoge Jan van Lotteringhen, van Brabant ende van Limburch; mer here Jan van Drongelen, sijn oom, was hiertegen alsoe veel als in hem was. Mer hy en mochtes nyet keren, noch houden tegen alsulken machtigen prince. Ende als dese heer Jan van Hoesden gestorven was, quam tot Brusel die graef van Sassenburch, die te wive hadde des voerseiden heren Jans enige suster, ende begeerde van den voernoemde hertoge Jan te leen tontfangen die heerlicheit van Hoesden mitter stede ende dat slot; ende als hi niet vercrigen en mochte is hi mit groter onwaerdicheit vandane gereyst, overdenckende dat men die stede, slot ende heerlichede van Hoesden te lene houdende was van den graefscap van Hollant. Ende hi is getogen bi grave Willem van Hollant, ende vercofte hem die stede, slot ende heerlicheyt van Hoesden, myt alle sinen toebehoren, om een sekere zomme van penningen; uut denwelken naderhant een grote twijdracht op gestaen is tuschen Brabant ende Hollant.
Int jaer Ons Heren M III C XXXV wert ghefundeert ende ghestycht dat Cartuser cloester binnen Coelen op dyeselfde plaetse, alst te gheloven is, daer Sinte Severijn, biscop van Coelen, des snachts, als hi ghinc versoeken dye heilighe plaetsen, der martelaren Sinte Martijns zyel, biscop van Tours, op sach voeren mit engelschen sanghe in den hemel, als sijn legende breder uutwijst.
Auteursrechtelijk beschermd