Van een wijf uut Zeelant, dye een roesinne was.
Dat XIX capitel.
Int jaer M III C XXIII, Kaerle dye Scone, coninc van Vrancrick, Phillips die Scoen sijn soen, die een oom was des graefinne van Hollant; dese coninc Kaerle nam te wive keyser Henricxs dochter die sevende van Romen. Dye coninc dede bidden ende vergaderen vele princen ende heren uut Vrancrijc ende daer omtrent, om te comen tot Parijs, ende festiveren ende eren die brulofte ende croninge des coninginne, sijns toecomende huysvrouwe; welke feeste die goede graef Willem mit vele edele baronen ende ridderen uut Hollant ende Henegouwen met sijnre huysvrouwe Johanna op die Pijnsterdach ghefestiveert ende gheeert heeft. Ende dese feeste worde ghehouden ende verchiert mit vele triumphen ende bliscappen, mit musiken ende rethorike, mit snaerspelen ende mit menigherley ander spelen, van der avonturen welcke altesamen luttel oft nyet worden gheacht ende gherekent bi allene dye teghenwoerdicheit een der vrouwen. Alle spelen, alle jocken ende boertinghe batamenten worden versmaet van allen, opdat si aenscouwen ende sien mochten die vrouwe dyen die Zelanders overgesonden hadden ende mit grave Willem daer gecomen was. Want si was soe groot van lichaem ende so wonderlike groot an te sien, dat mannen van middelbaer statuere ende grootheden by haer als kinderen te houden waren. Si was so starc dat si in elken hant een vol vats Hamburgher biers swaers droech, alsof si leech waren gewest; men seide waerachtelic dat een balc de VIII mannen niet dragen en mochten, droech si alleen daer men hebben woude. Mer tmeest was te verwonderen dat hoer vader ende moeder also cleine personen waren ende si so groot ende starc was.
Auteursrechtelijk beschermd