Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat casteel van Ghoey gewonnen wert ende van des biscops doot.
Dat XI capitel.

In den jare M III C XVII, als biscop Ghije lange in Vrancrijc hadde geweest, is hi weder in zijn lant ende bisdom gecomen, ende ordineerde ende stelde dat in goeder politien ende vreden castiende die quaetdadige met sware correctien. In desen tiden was een jongeling geheten Gijsbrecht van Ghoeij, ende hadde in sinen jonge jare gestaen onder die voechdye Johans, die seste heer van Culenburch ende Claes van Cats. Die biscop begeerde van desen II voechden rekeninge ende bewisinge te hebben uut des jongen kints name, van alle datgene dat si ontfangen ende opgeboert hadden, ende woude oec mede die voechdije resigneret hebben. Dese twe, Jan ende Claes, en achten des biscops woorden niet, ende en wouden gheen rekeninge doen, noch oec die voechdye overgheven; waerom dye biscop uut Hollant ende uut sinen Stichte dede vergaderen een scoen heer van volc, ende beleide al omme dat huys te Ghoije; ende scoet so vreselicken an de muren ende toornen dat die borchsaten seer daerof worden benauwet. Ende als si dye grootmoedicheit des biscops ontsagen, ende dat si met so crachtigen heer van volc ombeseten ende belegen waren, gaven si hem ten lesten op in des biscops handen, behouden haer lijf ende goet, ende beloofden den biscop van de versmadenisse ende scande te voldaen. Dye biscop heeft dat slot bevolen Aernt van IJselstein ende Willem, grave Floris' bastertsoen van Hollant, dat si dat trouweliken souden bevaren. Mer in derselver nacht is biscop Gwije bevangen geworden mit eenre groter haesteliker siecten, ende in tegenwoerdicheyt sijnre dienres heeft hy sinen geest opgegeven op die vierde kalende van julio. Sommige meenden dat hi vergeven was, ende van stonden an quamen de twe verdreven burchsaten mit een deel geselscap doir bekenden toepaden in der doncker nacht, ende setten haer lederen an die muren, ende beclommen also dat huys. Ende alle des biscops volc dat daerop was ende noch op haer bedden laghen ende sliepen, dreven si met dreijghelicke woorden van den huse. Dat dode lichaem des eerwaerdighen vaders worde binnen Uutrecht gebrocht ende met eerliker uutvaert in den doemkercke begraven. Dese eerwaerdighe vader biscop Gwije berechte dat bisdom met groter eeren XVI jaer lang. Hy dede den heylighen Sinte Martijn tijmmeren tot sijnder ewigher eren ende ghehoechnissen drie castelen als Ghoer, Dullenburch ende Stoutenburch. Hy betaelde int hof van Romen XIIII C ponden, dye sijn voersaet biscop Willem daer sculdich ghebleven was. Hy lyet dat bisdom sonder scult sinen nacomer, datwelck hy in sinen leven tegen alle sine omgeseten vianden machteliken ende vredeliken hadde gheregeert. Dese biscop Ghwije was een scoen man van aensichte, vroem van stature, wel sprekende van woorden, claer van verstande, cloeck van rade, ende met menigerhande doechden van Gode versien. Des tsjaers daeraen, op Sinte Martijnsdach in dye somer worde een yghelick arm mensche gegheven enen goeden silveren penninck voer die memorie ende siele des voerseyden biscops Ghwije van Uutrecht.