Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Noch een mirakel.
Dat X capitel.

Op dieselfde tijt was een man binnen Gorichom woenachtich, gheheten Geroncus; ende was seer rijc ende vreckich. Dese man was een coerncoper, ende plach den luden tarwe, rogghe, gherst ende ander weyt aen haer ghelt te vercopen. Ende als die dieren tijt anstaende was, so sloet desen man sijn solderen, vol leggende met alrehande coern, toe, hoepende overmids den dieren tijt veel scats ende goets van sine poorters daer of te crigen; ende hi en gaf oec den armen voer dye doeren niet om Goods willen. In derselver stede was oec op die tijt een wedue, die sere devoet tot Gode ende milde tegen den armen was, hebbende grote medeliden mitten armen luden. Dese goede wedue gaf den armen ende behoeftigen³⁶⁸ menschen uut blider herten ende mit vrolicken aensichte haer coern van haren solder, lutter³⁶⁹ denckende opten dach die toecomende was. Op eenre tijt, als dese vrouwe mit haer huysgesin over maeltijt sat, quam daer een arm vrouken mit veel kinderkens, wenende ende claghende voer die doere, mit screiende oghen, dat si mit haer kinderen van des dages te voren van XII uren tot dier tijt toe geen broot gegeten en hadden. Die vrouwe hadde grote medeliden mit dat arm wijfken ende haer kinderkens, ende dede se incomen, ende gaf hen te eten also veel si mochten. Ende beval hair joncwijf dat si dat vrouken halen soude een scepel coerns van dye solder, opdat si met haer kinderkens van honger niet en versmachten. Op dwelke dat joncwijf al murmererende ende quaet sprekende seyde: 'Vrouwe, wij en hebben niet meer dan drie scepel coerns in al onse huys, ende dat verteert ende opgegeten hebbende, waervan sullen wy dan leven?' Doen seyde dye vrouwe: 'Gaet in den name ons Heren, ende doet als ic u bevolen hebbe; God de Here salt versien.' Dat joncwijf is met groter onwaerdicheit van haer gegaen, ende clam op die solder, ende als sij die doere van den solder op dede, so sach si den solder vervolt mit veel scoen coerens, ja, also vol, dat dat coern overvloedeliken quam haer teghen, ende dwanc dat joncwijf afterwaers te gaen! Dat joncwijf uut groter bliscappen beghan lude te roepen, dat si allegader boven op die solder comen souden, ende sien die grote tekenen ende miraculen die God daer hadde gedaen. Als die uutvercoren vriendinne Goods, die goede vrouwe, dit hoerde ende sach, loofde ende dancte si God van hemelrijke van Sine milde ende overvloedighe gaven, ende si dede uutroepen bi enen bode doer alle dye straten van der stede, dat alle arme luden ende dye behoeftich waren comen souden tot haren husen, ende si woude enen ygeliken mededelen van dat goet dat haer God hadde verleent, nadat elcx van doen ende node ware. Als dit dus vercondicht was, soe was daer grote bliscap in der stede. Daerna heeftet die Godlicke bermherticheit belieft, ende heft hem des menscelike natuers ontfermt, ende heeft dat coern overal overvloedelic laten wassen; ende daer is so veel coerns in den lande ghecomen, dat men een scepel rogghe cofte om vijf Tournoytse groten, dat men daer tevoren cofte om vijf scellinghen Tournoys. Dye vrecke, ghyriege man voerseit, als hi sijn solders mede opghedaen hadde om te vercopen, heeft hi enen vreselicken stanc vernomen te wesen in dat coern, alsoe dat ment niet vercopen en mochte, noch eten ende ghebruken van den menschen ende beesten; ende van groter noot heeft hi dat coern moeten laten brengen bi nachte in dat lopende water, mit groter confusen ende scanden. Ende aldus heft dese onsalige vrec-

368 behoeftingen AB.

369 Aldus AB. C echter leest luttel.

[p. 198r]

ke mensche noch Goodsloon noch tijtlick loon van sijn coern ghehat. Dese diertijt duerde bina II jaer.