Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van grave Jan van Boloys grave Willems broeder.
Dat III capitel.

Dese goede graef Willem hadde een broeder geheten Johan van Beadmont of Bollemont,

[p. 196r]

die daerna tot enen wive nam des graven enige erfdochter van Bloys ende Suessen, ende is van zijns wijfs wegen, na haer vaders doot, geworden grave van Bloys ende Suessen. Ende hi wan an haer Johan, die na hem grave wert, die vader van grave Jan ende Gwije. Dese grave Jan vercreech van sinen broeder den goeden graef Willem van Henegouwen ende Hollant de steden van der Goude ende Scoenhoven mit haren toebehoren ende tollen; in denwelken hi die sloten dede vermeren ende grotelic verbeteren. Hi fondeerde ende dede maken in die stede van Scoenhoven een cloester van der Oerden van Onser Liever Vrouwen broeders van den Berch Carmeli, daer hi grote devotien toe hadde.