Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die goede grave Willem van Henegouwen, die XIX grave van Hollant, Zeelant ende heer van Vrieslant.
Dat II capitel.

[p. 195v]

Die goede graef Willem van Henegouwen.

Willem, dye eerst was grave van Oestervant, worde nu, na grave Jans ( zijn vaders ( doot, dye XIX graef van Hollant, Zeelant ende heere van Vrieslant; dese graef Willem, die derde van dien naem, wort gemeenlicken geheten om sine doechtlike ende rechtverdige werken die goede graef Willem; hi was van alle princen ende lantsheren in groter eren gehat, ende worde van allen geheten te wesen een meester der ridderen ende een heer der princen; hi hadde te wijf grave Kaerls dochter van Valoijs, coninc Phillips soen van Vrancric, geheten Johanna. Haer broeders waren Phillips, coninc van Vrancrijc, ende Kaerle, graef van Alleson. Dese goede graef Willem wan bi Johanne zijn huisvrou Jan, dye jonc starf; Willem, graef van Oestervant, zijn nacomer; ende Lodewijc, die oec jonc starf; Margriet, keiserinne van Romen, keiser Lodewijcs wijf van Beyeren; Johanna, graefinne van Gulic; Phillippe, coninginne van Engelant; ende joncfrou Elisabeth. Dese goede graef Willem dede int eerste zijnre dominacien een costelic hof beroepen binnen Haerlem. Daer waren vergadert XX graven, hondert banroetsen ende M ridderen, mit ontelliken vele vrouwen ende joncfrouwen, edele sciltknechten ende geboertige mannen. Ende dit hof duerde een hele weke lang, ende worde mit uutermaten grote chierheit ende costelicheit gehouden, mit steken, tornieren, hoveren ende dansen, ende mit andere ridderlike oeffeningen. Daerna worde dese ghoede grave Willem van den koervorsten gecoren te wesen een vicarius ende stathouder des Roemschen Rijcs, ende worde in sinen dagen van den edelen ende princen van den landen hoechliken geeert ende in groter waerden gehat; want hi mit groter vromicheit twe uutermaten starke castelen wan, gelegen in den Sticht van Colen, als Bruijl ende Volmestein. Dese goede graef Willem, dye wilde vermeren den dienst Goods, fondeerde ende stichtede een collegie in die stede van Middelburch in Zeelant int seste jaer dat hi hadde regiert, ende begaefde dat rikeliken tot zijnder ewiger memorien ende gehoechnissen.