Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat joncheer Jan uut Engelant in Hollant quam.
Dat V capitel.

Ende want die grote twiedracht alle daghe meer ende meer worde in den landen van Hollant,

[p. 185v]

soe heeft heer Dirc van Bredenrode raet genomen mit here Floris, regael abt des cloesters van Egmont, ende mit here Henric, burchgrave van Leiden, ende mit heer Willem van Egmont, wat si in deser saken angaen ende doen souden. Dese heren, uut zonderlinge raet des heren van Bredenroede, hebben doen bereiden scepen, ende hebben enige edelen ende vrienden mit hem genomen, ende zijn tot haer selfs costen, mit hem nemende den roese Claes van Kijeten gevaren in Engelant, biddende den coninc oetmoedeliken hem te willen consenteren ende gonnen dat joncheer Jan, des verslegen grave Floris' soen, mit hem mochte varen ende annemen sijn heerlicheit. Die coninc Eduwaert, deerste van dier namen, heeft dese heren van Hollant gracioeselic ende minlic ontfangen, ende heeft een uutermaten scoen ende costelic scip doen bereiden, mitten welken hi joncheer Jan ende Elisabeth, zijn dochter, joncheer Jans wijf, in Hollant over heeft gesonnen, bevelende den here van Bredenrode die voechdie van desen joncheer Jan, dat hi hen regeren ende trouweliken bewaren soude. Mer also hem die wint contrarie was, so is joncheer Jan mit sijn scepen in Zeelant angecomen. Denwelken here Wolfaert van Borsselen, here van der Vere, ofsettende ende versmaede alle die Hollantse heren, behendelycken in zijnre hode ende voechdye genomen heeft; ende heeft voert den heren van Hollant dye hem uut Engelant op horen costen hadden ghehaelt ende dien hi sonderlinge bevolen was te bewaren, van den coninc verdruct ende van den grave verdreven; want tot eenre tijt ist gesciet dat joncheer Jan mit alle zijn heren was tot Reimerswale, ende doer ingeven heren Wolfert van der Vere heeft jonchere Jan van Hollant den here van Bredenrode, die een simpel man was, onnosel van boesheden ende niet quaets noch arch vermoedende, gezonnen om zonderlinde saken te tracteren tot Zijrixze. Ende daerentusscen is joncheer Jan mitten heer van der Vere te scepe gegaen; ende hy brocht hem op zijn casteel, ende verdreef van hem alle dengenen dye hi hatede ende hem mishageden, ende bisonder den here van Bredenrode wort oerlof gegeven by enen bode, ende dat hi trecken soude totten sinen in Hollant.