Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die oorloge die die West-Vriesen hadden tegen den Hollanders doer ingeven biscop Willems van Uutrecht.
Dat IIII capitel.

Willem van Mechelen, die XLI biscop van Uutrecht, als hi in sijn bisdom ontfangen was, so heeft hi bevonden dat dat bisdom overmits dat regement zijnre voervaders mit grote oorlogen ende twedracht beladen ende beroert was; dat welke hi in goeden state wederom begeerde te brenghen. In den eersten heeft hy dat huys te Muden met swaren belegge ombesingelt, ende mit menigherlei instrumenten daeran gestormt, also dat die castelein Dirc van Haerlem heeft hem ten lesten dat huys op gegeven, behouden zijn lijf, ende is des biscops gevangen geworden. Uut desen voerspoedicheit ende victorie is die biscop grootmoedich geworden, ende is getogen in West-Vrieslant, ende heeft daer des biscops oflaet gepredict tegen den Hollanders. Die Vriesen aftervolgende ende houdende haer oude manieren, ende geneyget wesende tot ingeboren rebelheit, dye biscop raet ende daet daertoe gevende, zijn met alle haer macht getogen voer dat huis te Widenesse, ende hebbent swaerlicken belegen, daeran doende menige assaulte ende anvechtinge. Ten lesten, Boudewijn van Naeldwijc, als hy alle sine provanden ende dat hem van noden was verteert hadde, heeft hi den Vriesen dat casteel opgegeven, behouden dat hi mit alle zijn goet rusteliken daerof trecken soude in Hollant. Ende terstont braken die Vriesen dat casteel of ende verwoesten dat; ende diergeliken deden si dat huis te Eningenburch, ende togen doen voert ende belegen dat slot te Medenblic, ende verbranden dat stedeken altemael. Floris van Egmont ende dye andere, die met hem op dat huis lagen, weerden hem vroemliken ende hadden menigen scermutsinge mitten Vriesen. Ende als si dus swaerliken waren beleyt, hadden si groot gebrecs vitaelge, dat hen die noot daertoe dwanck dat si paerdenvleis mosten eten. Die grave Jan van Henegouwen dit verhorende, heeft dat regement van Hollant anghenomen van zijns neven wegen, ende is mit groter macht van volc gevaren in Vrieslant. Ende daer bleven omtrent XXXV Vriesen geslegen, want die ander wechgelopen waren. Ende hi voersach dat huis mit provande ende mit ander dat hem van node was. Here Jan van Arkel ende heer Claes van Putten verbranden die stede van Enchusen, ende namen enen groten roof vandaen, ende zijn mit alle haer scepen ongescent mit groter eren te lande gecomen.