Hoe grave Floris overghevaren is in Engelant ende van den strijt die hi hadde tegen die Vlamingen.
Dat XX capitel.
Als grave Floris dus hoochlicken verheven ende ontsien was onder alle andere princen heeft hi hem bereit mit een eerlicken staet van heren, ridderen ende knechten, ende is overgevaren in Engelant tot coninc Eduwaert van Engelant, van dier namen die eerste, ondersoekende oft hi bi enige middelen ende manieren comen mochte in der possessien ende besitten des conincrijcs van Scotlant, datwelcke an hem bestorven ende gheerft was van grave Florijs, die X grave van Hollant; ende overmits rebelheit sommiger heren van Scotlant, dye daertegen waren, en conde hi in dat besit niet comen. Ende also men seyde, so en stont hem zijn sin nyet in Scotlant te wesen, ende men vernamt wel, dat hijts liever quijt gheweest waer dan behouden, wanttet hem ongelegen was. Mit corten woirden: hi vercoftet rijck bi rade des conincs van Engelant om ene grote somme van ghelden. Dese grave daer bi den coninc dus wesende, worde daer een hijlic gemaect ende gesloten, als dat Johan, grave Florijs soen, nemen soude tot enen wive Elizabeth, des conincs dochter; ende mits desen huwelike souden die coninc ende grave in trouwer liefden tsamen verbonden wesen. Die grave Gwie van Vlaenderen, benidende dese vrientscap ende verbant des conincs ende graefs, heeft een groot machtich heer vergadert in Casant, om nu anderwerf in te nemen ende winnen dat lant van Walcheren. Dit vernemende heer Dirck van Bredenroede ende heer Jan van Renesse, ridderen, hebben terstont veel volcx uut Hollant ende Zeelant tesamen vergadert, om also den grave van Vlaenderen crachteliken te wederstaen. Die grave Floris van Hollant dese mare in Engelant vernemende, heeft terstont zijn scepen doen bereiden, ende is ghecomen tot Vlissingen in Zeelant, daer hi zijn volc dede vergaderen. Ende als die grave van Vlaenderen merrende was, ende niet over en quam, is heer Jan van Renesse van des graven wegen overgetogen, ende heeft dat stedeken van der Sluse verwoest ende aen brande gesteken. Ende here Dirc van Bredenroede heeft zijn volck bevolen dat si hem int harnas rede maken souden, ende is mit sinen gewapenden heer mit vele scutters ende vrome wapentuers, mit geweldiger hant getogen in Cazant, ende heeft sine bannieren ontwonden ende zijn trompetten ende hoornen doen opgaen, ende heeft dat hele lant van Cazant crachtelicken doergelopen, mit roven ende branden, ende jammerlicken verwoest ende verdorven. Die Vlamingen, omtrent IIII M starc wesende, zijn vergadert ende haesteden hem om dese Zelanders te besingelen ende mit haer scepen in den gront te verdrencken. Mer die vrome ende onversaechde ridder here Jan van Renesse niet meer hebbende dan drie hondert man is desen Vlaminghen stoutelijcken anghegaen, ende heeft alle dye Vlaminghen vluchtich gemaect, vele geslegen ende verdrenct,
Auteursrechtelijk beschermd