Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe graef Floris Vrieslant onder hem brochte sonder strijt.
Dat XIIII capitel.

In den jare Ons Heren M CC LXXXV, doen wast alten groten storm van winde ende tempeest in der lucht, datter veel dyken in Vrieslant, Hollant ende Zelant inbraken, also datter een grote opvloet ende water in den landen was, daer veel volcs ende beesten in drencten ende grote scade dairof quam. Heer Dirc van Bredenroede, die XI, die men hiet die goedertieren, een vroem, cloec ende wijs oerlochsman, heeft doir gebot van graef Floris vergadert veel volcs van wapenen, ende is mit scepen ende scuten gevaren in Vrieslant, ende heeft veel volcs geghyselt ende mit hem genomen, want niement den anderen overmits dat water te hulpe comen mochte, ende heeft also alle Vrieslant gebrocht onder subjectye ende onderdanicheit van graef Floris, sonder slach of strijt. Ende als dat water weder ter zeewert in gevloeyt was, heeft grave Floris doen maken IIII castelen, als Medenblic, Eningeburch, Middelburch ende Nyeburch, opdat hi mit desen die ingeboren³⁰⁷ rebelheit ende wederspannicheit des ongetemden volcs der Vriesen mede dwingen ende tonderhouden mochte. Als die Vriesen sagen dat graef Floris dese sloten begonde te maken ende si geen weer tegen doen en mochten, doe dochten si wel dat si verheert waren, ende deden doe dat si node deden, ende overdroegen, want si niet beters en wisten dan den grave onderdanich te wesen. Doe quamen binnen dier tijt dat dye grave daer lach om dese voerseide sloten te volbrengen die III vierendelen van Hoochtwouder ambocht, van Nyewedorp, Winckel, Bersingenhorn, Oest-Manroe, Vrolen, Outdorpbroec, Zuysterwoude, Noorstherwoude, Outkerspoel, Warmenhusen, Nyelant, Duringehorn, Enigebroec, Oeterleec, Veenhusen ende Medemblic, ende overdroegen een soen mitten grave ende sworen voer hem ende horen nacomelingen, grave Floris ende sine nacomelingen, graven te Hollant, ewelicken onderdanich te wesen, alse horen rechten here; ende gaven over gemeenlic dat hi in hoer lant gemene wegen mochte maken, groot oft clein, hoe hem dat genoechde; ende daertoe gaven si hem die thienden van den corne, dye vroenscoude ende heervaert te gebieden. Ende graef Floris gaf hen weder alrehande puncten van rechte, ende consenteerde hen oec mede te gebruken sulc recht als de van Vrolen ende Outdorp van den coninc Willem, sinen vader, hadden. Dese soene ende voerwaerden gescieden tot Thorenburch op Sinte Agnieten avont int jaer Ons Heren M CC ende LXXXVIII. Die grave, omdat hi die bose Vriesen ontsach ende hem altoes gruwede, al wast dat si hem hulde gesworen hadden, dat si den eedt onlange gedencken ende houden souden, als si doch en deden, so woude hij ymmers dat huys te³⁰⁸ Medemblic volmaect hebben, ende ghinc dairom mit een heer volcs leggen op Meloerde, ter tijt toe dattet huys volmaect was. Hi dede leggen die Nyeburch bi Vronen opter geest opt einde van Vrieslant, omdat men van der burch tAlcmaer soude gaen ende anderwaer,

307 ingeborev AB.

308 te te AB.

[p. 180r]

waer men woude. Hij dede Middelburch leggen an des dijcskant, dat men daer of den dijck bescermen soude of men insteken woude. Thorenburch, dat coninc Willem zijn vader hadde doen maken, stont dairbi; dat was daerom gedaen, dat men geen van desen sloten beleggen en mochte om te winnen, want si en staen so wide niet vaneen, men schietet wel mit II scoten. Hi maecte oec thuys te Nyendorn, dat die Vriesen daerna nederworpen. Grave Floris, doe hi die Vriesen aldus bedwongen hadde, thant daerna, toech hi over tot Staveren, om te vernemen die zeden ende manieren van den Oest-Vriesen. Ende so die van Staveren wel vernomen hadden zijn mogentheit, die hi an den Vriesen getoent hadde, hoe dat hi zijn sloten aldaer in den landen geset hadde tegen horen danc ende spite, ende hem onderdanich geworden waren, ontsagen si oec zijn grootheit, ende wordens te rade binnen der stat, dat si hem onfaen wouden voir horen here, als si deden. Ende brochten alle die poerteren te samen voer den grave, dyen si gemeenlicken mit vrien moetwillen hulden, mit gestaefden eede, dat si hem ende sine nacomelingen, graven te Hollant, kenden voir horen rechten lantshere. Ende omdat si dit uut hemselven ende ombedwongen deden, dancte hij se, ende gaf hen daervoir veel vriheden ende poertrechten, die geen noot en zijn al hier te scriven. Ende aldus sceide graef Floris van Staveren, dair hem van den notabelsten ende wijsten volchden tot Aelbrecht Berge, om hoer vryheden ende recht bezegelt te hebben, die hem daer ghegeven ende bezegelt worden, int jaer Ons Heren M CC ende XCII.