Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Otte van Hollant, die XXXVI biscop van Uutrecht.
Dat XII capitel.

Otte, die derde van dyer name, grave Willems zoen ende grave Floris broeder van Hollant, wert eendrachteliken, doer anroepinge ende inspiracie des Heiligen Geests, van al den cappittelaren geelegeert ende gecoren de XXXVI biscop van Uutrecht, een doerluctich ende hoechgeboren man van coninclike gheslachte. Dese Otte was na den doot sijns vaders gevoecht ende geordineert totter ridderscap, ende ontfing van sinen broeder dye graefscap van Oest-Vrieslant te leen ende te regeren; mer hi begaf die heerscappie, ende nam an dat bisdom, dat hy seer arm ende in groten sculden vant beladen van den rebellen ende ongehoersamige Drenters, ende mede dat die diken dicwils braken ende dat lant overvloyede mitten water, tot groten scade van den landen. Ende bi Goods insprekinge vercofte dese biscop vele van sine goeden, dye hem sijn vader gheerft

[p. 162r]

hadde in Hollant, ende betaelde des bisdoms sculde, ende lossede sine castelen, ende berechte dat bisdom lange tijt als een waerlic hertoghe ende here; ende tot sinre oetmoediger supplicatien ende bede, dede graef Floris van Hollant sijn broeder enen starcken dijck leggen van Amerongen tot Scoenhoven, op sijn eygen costen; ende tot sijnre ewyger memorien ende love dede hi den Stichte van Uutrecht veel goets.