Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van biscop Otto²²¹ van Gelre, die XXXIII biscop van Uutrecht.
Dat VII capittel.

Ende als biscop Diryck van Uutrecht gestorven was ende begraven, sijn binnen der stat van Uutrecht gecomen Adolf, aertsbiscop²²² van Collen, Otte, biscop van Monster; Gerrit, biscop van Osenbrugge, drye gebroders; Willem, grave van Hollant; Otte, grave van Gelre, om te bidden die ecclesie voer enen nyewen pastoer ende biscop, doer welcken heren beden ende supplicatie die heren van den capittele coren here Otte van Gelre, proest van Zancten, te wesen dye XXXIII biscop van Uutrecht. Hy was een jonc man van XVIII jaren, wijs van verstande, scoen van aensichte, ende was grave Otten broeder van Gelre, ende hadde opgenomen te Romen te reisen om dispensacie te vercrigen van den paeus op die joncheit der jaren, want men genen biscop ordineren moet, hi en moet XXX jaren out wesen na den geestelicken rechten; mer wesende tot Noorthusen, int Over-Sticht, wert hi mit eenre coortsen oft zage gevangen, ende starf aldaer, int jaer Ons Heren M II C ende XIII, als hi dat bisdom in groten vrede hadde berecht omtrent vierdalf jaer; ende wert tot Uutrecht gevoert ende begraven, mit groter eren, an de noertside van der Domkercke; ende al was hi een jong man, so was hi seer discreet ende besceyden in rechtelyke saken, ende seer behendich ende clouc in saken den ghemenen oerber des Stichts ende der kerken angaende.

221 ottt AB.

222 aertsbiscos AB.