Hoe dat grave Willem van Oest-Vrieslant, grave Dircs broeder, in Hollant quam.
Dat II capittel.
Onder desen vernam grave Willem van Oest-Vrieslandt, dat grave Dirck, sijn broeder, gestorven was; ende quam, alst reden gaf, harde rouwich totter Zypen toe, omdatGa naar voetnoot194 hy gaerne tot sijns broeders uutvaert hadde geweest; ende versochte om geleyde te hebben van der graefinne ende dyet mit hoer hilden, dwelc hem geweigert wert. Ende hi en dorste sonder geleide in Hollant niet comen. Ende aldus lach hi aldaer, toter tijt toe dat zijns broeders uutvaert gedaen was, ende keerde doe weder sonder beraet in Oest-Vrieslant. Zijn magen ende vrienden, die hi in Hollant hadde, als Floris, sijn broeder, domproest tot Uutrecht, grave Otte van Bentem, sijn oem; Jacob, de castelein van Leyden; Phillips van Wassenaer; Simom van Haerlem; Willem van Teylingen; Jan van Rijswijc; Wouter van Egmont ende Aelbrecht Banyaert, ridders, waren qualic tevreden dat si van enen wive geregiert souden werden, ende overdroegen daerom mitter machte van Hollant, ende verbonden hem mit malcanderen, sodat si van der graefinne noch oec van den grave van Loon nyet berecht en wouden wesen. Ende als dit verbant ghemaect was, senden dese voerseide personen enen goeden secreten notabelen man tot grave Willem in Oest-Vrieslant, ende deden hem seggen hoe dat si verbonden waren geliken voerscreven is, ende dat hi vrylic ende sonder anxst quame tot Egmont, oft bi hemluyden, si souden sijnre waer nemen. Aldus is grave Willem als hij bedectelixste mochte uut Vrieslant gevaren, ende is gecomen in Zelant tot Zyricxszee, omdat die wint niet ghelijck en stont om in Hollant te comen, dair hi rechtevoert van den Zeeuschen heren ontfangen werdt, ende grave verheven. Hierenbinnen zijn Wouter van Egmont ende Aelbrecht Banyaert, ridders, getogen mitten Kermers binnen die steden van Haerlem, ende maecten daer sulck ghescaf ende storm tegens den grave van Loen ende Alijt, der weduen van Hollant, die daer doe waren, also dat si ende Ghijsbrecht van Aemstel ende andere, die mit hem daerbinnen waren, van vresen ende anxst die stede ruymden, ende togen in der doncker nacht tot Uutrecht, om dair te onthouden. Ada, die jonge maget, bleef binnen Haerlem onlange, ende ruymde oeck vandaen, mit Rogier van der Mere, Otte van Vuyren ende meer andere ridderen ende knechten, dye den grave vanGa naar voetnoot195 Loon toebehoerdenGa naar voetnoot196, ende quamen van anxste binnen der vesten van Leyden om daer onthout te hebben ende tegen haer vianden te verweren. Die Kenemers, mit here Wouter van Egmont, hoer leydsman, volchden joncfrouwe Ade, der maget, ende den horen na, als si snelste mochten tot Leyden. Ende quamen daer oeck binnen here Phillips van Wassenaer metten Rijnlanders, also hi hoer hoofthere was, ende bestormden den Burch aldair mit menigerhande instrumenten, ende brochtent dengenen die daerop waren soe na, dat sijt van noots wegen opgeven mosten, ende den Burch rumen, want si ghene vitaelgen en hadden. Grave Willem, die noch in Zeelant was, vernam hoe die grave van Loen ende die wedue van Hollant gevloden waren tot Uutrecht, ende die jonge maget joncfrouwe Ade tot Leyden ware getoeft, sceyde hi uut Zeelant ende quam haestelick in Hollant, dair hi doe bi zijnre vrenden rade al Hollant an hem vercreech; ende dede sinen wille mitter geenre goeden die tegen hem geweest hadden. Doen sende hi Ade zijnre nichte mit enen sconen eerlicken staet als hoer betaemde int eylant van Texsel in Vrieslant.
Auteursrechtelijk beschermd