Hoe ende wanneer die biscoppen van Uutrecht weder vercreghen die biscoplicke infule ende mytre.
Dat IX capittel.
Omtrent dese tijt wert binnen der stat van Riemen in Vrancrijc gehouden een generael concilium, daer alle die biscoppen van Walslant ende Duytslant vergadert waren mitten paeus van Romen, die dair doer ontsich ende vrese des keyser Henrics geweken was. Ende also biscop Godebalt van Uutrecht op die tijt sere siec ende cranc van lichaem was, so dede hi mit brieven bi sinen nagheseten biscoppen tegen den paeus sinen ontschult, biddende oetmoedelicken den paeus hem te willen verlenen dat hi ende sine successoren ende biscoppen van Uutrecht voertan die biscoplicke infule ende mytre souden mogen ghebruycken. Die paeus ontfangende minlicken des biscops ontscult, ende overmits eerwaerdicheit des Heyligen Kercks van Uutrecht ende doer liefte ende kennisse dye si II onderlinge hadden gehadt, verleende hi desen biscop ende sine successoren dat si voertan tot ewigen dagen die biscoplijcke infule ende mytre souden mogen gebruyken, hem dairof gevende een bulle onder sinen zegele besegelt. Die sake waerom dat die biscoppen van Uutrecht gheen mytren en gebruycten, is hiervoer gheseyt onder die gesten van Sinte Bonifaes, den anderden bisscop van Uutrecht.
Auteursrechtelijk beschermd